Qashqadaryo viloyati Qarshi shahar “Shodlik” mahallasida joylashgan ko‘p qavatli turar joylarning birida 29-yanvar kuni mudhish voqea sodir bo‘ldi, deb xabar bermoqda Nasafnews.
Qayd etilishicha, O.S. ismli yigit (1999-yilda tug‘ilgan) uyning 4-qavatidan pastga yiqilib, voqea joyida vafot etgan.
“Marhumni taniganlar va uning yaqinlari voqea uyushtirilganini aytmoqda. Ammo yigit o‘z joniga qasd qilgani haqida ham taxminlar yo‘q emas”, — deyiladi xabarda.
Nashr bergan ma’lumotga ko‘ra, marhum yigit bu yerda rasman nikoh qurmagan ayol bilan birga ijarada yashab kelgan.
“Yaqin qo‘shnilarining aytishicha, voqeadan avval do‘stim yashagan uyda janjal sodir bo‘lgan. Har xil ovozlar eshitilgan. Lekin do‘stimni o‘z joniga qasd qilganiga ishonmayman”, — deydi marhumning yaqin do‘sti Sh.Q.
Aytilishicha, ayni paytda marhum yiqilgan joyga tosh to‘kib qo‘yilgan. U bilan birga yashagan ayol esa bu uyda yashamayapti.
Marhumning onasi D.T. voqeaga o‘g‘li bilan yashab kelgan ayol ham sababchi ekanini bildirgan.
“U o‘g‘limni boshini aylantirib olgandi. Hattoki yaqinda tug‘ilgan bolasining ham otasi o‘g‘lim ekanini aytdi. Ammo bu yolg‘on. Ayol bir vaqtning o‘zida nafaqat o‘g‘lim bilan, balki boshqa erkaklar bilan ham uchrashib yurgan”, — deydi u.
“Shodlik” mahallasi raisi Asadulla Imomovning aytishicha, marhum yigit bilan ijarada yashab kelgan ayol voqea sodir bo‘lgan vaqtda mast holatda bo‘lgan. Raisning qo‘shimcha qilishicha, ayni paytda holatni Qarshi shahar prokuraturasi o‘rganmoqda.
Mavzuga doir:
- Rossiyada balandlikdan yiqilib, og‘ir tan jarohati olgan migrant O‘zbekistonga qaytarildi
- G‘uzorda 42 yoshli erkak ko‘chadan o‘lik holda topildi. Marhumning yaqinlari uning o‘ldirilganini aytmoqda
- “Tanishlari bilan xayrlashgan”. Qarshidagi yotoqxona binosidan o‘zini tashlab, vafot etgan qizning so‘nggi lahzalari kuzatuv kamerasiga tushib qoldi (video)
Izoh (0)