Қашқадарё вилоятида фаолият юритувчи прокурор-ҳокимлар «Ўзбекистон прокуратурасига 30 йил» эсдалик нишони билан тақдирланди. Бу ҳақда «Дарё»га ҳокимликлар ахборот хизмати раҳбарлари хабар берди.
Қайд этилишича, вилоятдаги Ғузор, Миришкор ҳамда Шаҳрисабз тумани ҳокимлари мазкур эсдалик нишонга муносиб кўрилган.
«2006—2007 йилларда айнан Миришкор туманида туман прокуратураси терговчиси сифатида иш бошлаганман. Бугунги эътироф менга айнан ўша кунларни эслатди. Гарчи бугун ҳоким сифатида фаолиятимизни даво эттираётган бўлсак-да, тизимда ишлаган ходим сифатида эътироф этишгани мени жудаям қувонтирди», — дейди прокурорликдан ҳокимликка ўтган Миришкор тумани ҳокими Шерали Санаев.
Шерали Санаевнинг матбуот котиби Азизбек Яздурдиевнинг қўшимча қилишича, у 2013—2018 йилларда Миришкор тумани прокурори сифатида фаолият юритган.
Ғузор тумани ҳокимлиги ахборот хизмати раҳбари Худойберди Йўлдошевнинг маълум қилишича, 2018 йилнинг август ойидан 2020 йилнинг апрель ойига қадар Ғузор тумани прокурори, 2020 йилдан бери туман ҳокими сифатида ишлаб келаётган Бекзод Суюнов ҳам «Ўзбекистон прокуратурасига 30 йил» эсдалик нишонига муносиб кўрилган.
Шунингдек, прокуратура тизимида 17 йил фаолият юритган, айни кундаги Шаҳрисабз тумани ҳокими Самад Ҳасановга ҳам «Ўзбекистон прокуратурасига 30 йил» эсдалик нишони топширилган.
Қашқадарёда прокуратура тизимидан чиққан тўрт нафар ҳоким фаолият юритади. Айнан вилоят ҳокими Муроджон Азимов ҳам прокуратура тизимида ишлаган.
Изоҳ (0)