АҚШ президенти Жо Байден франциялик ҳамкасби Эммануэль Макрон билан телефон орқали суҳбат чоғида Украина атрофидаги вазиятни муҳокама қилди. Бу ҳақда Оқ уй сайтида хабар берилди.
«Президент кичик Жозеф Байден бугун (2 февраль) Франция президенти Эммануэль Макрон билан Украина чегараларида тўпланишда давом этаётган Россия қўшинлари ҳақида гаплашди», — дейилади Оқ уй пресс-релизида.
Ҳар икки етакчи Украина суверенитети ва ҳудудий яхлитлигини қўллаб-қувватлашини яна бир бор тасдиқлади. Улар дипломатик алоқалар ва Украина атрофидаги вазият ёмонлашса, Россия учун «тез ва оғир иқтисодий чиқимлар» тайёрлашни муҳокама қилди, дея қўшимча қилган Оқ уй.
«Президент Байден ва президент Макрон яқиндан мулоқотда бўлиб туришга жумладан, НАТОдаги иттифоқчилари ва Европа Иттифоқидаги ҳамкорлари билан маслаҳатлашувлар ўтказишга келишиб олди, », — дейилади пресс-релизда.
Киев ва Ғарб давлатлари сўнгги пайтларда Украина чегаралари яқинида Россиянинг «тажовузкор ҳаракатлари» кучайганидан хавотирда. Москва бу каби айбловларни бир неча бор рад этиб, ҳеч кимга таҳдид қилмаслигини ва бирор давлатга ҳужум қилиш ниятида эмаслигини айтмоқда. Москванинг фикрича, «Россия агрессияси» ҳақидаги даъволардан Россия чегаралари яқинида НАТОнинг кўпроқ ҳарбий техникасини жойлаштириш учун баҳона сифатида фойдаланилмоқда.
Аввалроқ Буюк Британия бош вазири Борис Жонсон Киевга ташриф буюриб, Украина президенти Владимир Зеленский билан музокаралар ўтказганди. Жонсон «россиялик аскарнинг оёғи Украина чегарасини кесиб ўтган дақиқада» Британия Россияга қарши санкциялар қўллашига ваъда берган.
Изоҳ (0)