Daniyada 1-fevraldan boshlab koronavirus pandemiyasi sabab joriy etilgan barcha cheklovlar bekor qilindi, deb xabar beradi Politico. Mamlakatda yana tungi klub va restoranlar ochiladi, niqoblar esa faqat shifoxonaga tashrif buyurilganda taqiladi.
Ta’kidlanishicha, mahalliy hokimiyat bu kabi qarorni vaksinatsiya darajasi yuqoriligi sabab qabul qilgan — daniyaliklarning 60 foizdan ortig‘i vaksinaning uchinchi dozasini olib bo‘lgan, Yevropa Ittifoqi revaksinatsiya darajasi 45 foizdan kamroqni tashkil etmoqda.
Daniyada har kuni 40—50 ming kishida koronavirus tasdiqlanmoqda, bu mamlakat aholisining qariyb 1 foizi demak (aholisi 5,8 million). Mahalliy sog‘liqni saqlash organlarning baholashicha, Daniyaning 80 foiz aholisi koronavirusning og‘ir shaklidan himoyalangan. Mamlakat sog‘liqni saqlash boshqarmasi COVID-19 ga topshirgan testi ijobiy chiqqan fuqarolarga to‘rt kunlik o‘zini-o‘zi yakkalash rejimini tavsiya qilyapti. Shengen zonasiga kirmaydigan mamlakatlardan kelgan emlanmagan sayyohlar uchun ayrim cheklovlar mamlakat chegaralarida hamon amalda.
Daniya hukumati cheklovlarni qayta joriy etishni rejalashtirmayapti, biroq “ehtiyotkorona optimizmni saqlab qolmoqda”. “Biz gap biologiya haqida ketayotgan paytda hech qanday kafolat bera olmaymiz”, — deydi mamlakat bosh vaziri Mette Frederiksen.
Daniya Yevropa mamlakatlari orasida cheklovlarni bekor qilgan birinchi mamlakatga aylandi. Shuningdek, 2022-yil boshidan beri yana bir necha davlatda karantin cheklovlari yengillashtirilgan. Xususan, Avstriyada fevraldan boshlab emlanmaganlar uchun lokdaun, Fransiyada esa ko‘chalarda majburiy niqob taqish va xodimlarga masofadan turib ishlashni tavsiya qilish bekor qilinadi.
Avvalroq Olimlar COVID-19 dan “superimmunitet” olish usulini aniqlagani, Ashxobodda qora rangli tibbiy niqoblarda yurish taqiqlangani, JSST xalqaro sayohatlarga cheklovlarni olib tashlashni tavsiya qilgani to‘g‘risida xabar berilgandi.
Izoh (0)