Данияда 1 февралдан бошлаб коронавирус пандемияси сабаб жорий этилган барча чекловлар бекор қилинди, деб хабар беради Politico. Мамлакатда яна тунги клуб ва ресторанлар очилади, ниқоблар эса фақат шифохонага ташриф буюрилганда тақилади.
Таъкидланишича, маҳаллий ҳокимият бу каби қарорни вакцинация даражаси юқорилиги сабаб қабул қилган — данияликларнинг 60 фоиздан ортиғи вакцинанинг учинчи дозасини олиб бўлган, Европа Иттифоқи ревакцинация даражаси 45 фоиздан камроқни ташкил этмоқда.
Данияда ҳар куни 40—50 минг кишида коронавирус тасдиқланмоқда, бу мамлакат аҳолисининг қарийб 1 фоизи демак (аҳолиси 5,8 миллион). Маҳаллий соғлиқни сақлаш органларнинг баҳолашича, Даниянинг 80 фоиз аҳолиси коронавируснинг оғир шаклидан ҳимояланган. Мамлакат соғлиқни сақлаш бошқармаси COVID-19 га топширган тести ижобий чиққан фуқароларга тўрт кунлик ўзини-ўзи яккалаш режимини тавсия қиляпти. Шенген зонасига кирмайдиган мамлакатлардан келган эмланмаган сайёҳлар учун айрим чекловлар мамлакат чегараларида ҳамон амалда.
Дания ҳукумати чекловларни қайта жорий этишни режалаштирмаяпти, бироқ «эҳтиёткорона оптимизмни сақлаб қолмоқда». «Биз гап биология ҳақида кетаётган пайтда ҳеч қандай кафолат бера олмаймиз», — дейди мамлакат бош вазири Мэттэ Фредериксен.
Дания Европа мамлакатлари орасида чекловларни бекор қилган биринчи мамлакатга айланди. Шунингдек, 2022 йил бошидан бери яна бир неча давлатда карантин чекловлари енгиллаштирилган. Хусусан, Австрияда февралдан бошлаб эмланмаганлар учун локдаун, Францияда эса кўчаларда мажбурий ниқоб тақиш ва ходимларга масофадан туриб ишлашни тавсия қилиш бекор қилинади.
Аввалроқ Олимлар COVID-19 дан «супериммунитет» олиш усулини аниқлагани, Ашхободда қора рангли тиббий ниқобларда юриш тақиқлангани, ЖССТ халқаро саёҳатларга чекловларни олиб ташлашни тавсия қилгани тўғрисида хабар берилганди.
Изоҳ (0)