Polsha Ukrainaga harbiy yordam doirasida “mudofaa maqsadlarida” foydalanish uchun “Grom” ko‘chma zenit-raketa majmuasi va uchuvchisiz boshqariladigan uchish apparatlarini yuboradi. Bu haqda Polsha bosh vaziri Mateush Moraveskiyga tayanib, PAP agentligi xabar berdi.
“Biz Ukrainaga birlamchi zarur narsalar va mudofaa qurollarini yetkazib berish orqali yordam berishga tayyormiz”, — deydi Moraveskiy.
Oldinroq Polsha Milliy xavfsizlik byurosi rahbari Pavel Solox mamlakat Ukrainaga hujum emas, balki mudofaa maqsadlarida “bir necha o‘n ming” qurol-yarog‘ni yetkazib berish niyatida ekanini tasdiqlagandi. Gap aynan qaysi qurollar haqida ketayotganiga aniqlik kiritmagandi.
Eslatib o‘tamiz, AQSh, Buyuk Britaniya, Kanada g‘arb OAVlarining Rossiya Ukrainaga bostirib kirishga tayyorgarlik ko‘rayotgani to‘g‘risidagi xabarlari fonida Kiyevga yordam berishini ma’lum qilgan. AQSh prezidenti Jo Bayden yaqin kunlarda Sharqiy Yevropaga amerikalik harbiy jo‘natilishini bildirgan.
Rossiya bir necha oydan beri Ukraina chegaralariga qo‘shin to‘plamoqda, bu esa G‘arb davlatlarining Rossiya Ukrainaga bostirib kirishga tayyorlanayotgani haqidagi taxminlariga sabab bo‘lmoqda. Moskva buni qat’iyan rad etib, qo‘shinlarning o‘tkazilishini mashqlar bilan izohlaydi. G‘arb davlatlari Rossiya Ukrainaga bostirib kirsa, unga qarshi sanksiyalar qo‘llashga va’da bermoqda.
Izoh (0)