AQSh Davlat departamenti Belarusdagi amerikalik davlat xizmatchilarining oila a’zolariga mamlakatni tark etishni buyurdi.
“2022-yil 31-yanvar kuni Davlat departamenti AQSh davlat xizmatchilarining oila a’zolariga mamlakatni tark etishini buyurdi”, — deyiladi xabarda.
Ta’kidlanishicha, “Rossiyaning Ukraina chegarasi yaqinida noodatiy va xavotirli harbiy faolligi”ning kuchayishi sabab yuzaga keladigan vaziyatni “oldindan aytib bo‘lmaydi va mintaqada keskinlik kuchaygan”.
“Vaziyatning yuqori darajada beqarorligini hisobga olgan holda AQSh fuqarolariga Belarusga bormaslik qat’iy tavsiya etiladi”, — deyiladi AQSh tashqi siyosiy idorasi xabarida. Shuningdek, AQSh elchixonasi Belarusda bo‘lib turgan amerikaliklarga mintaqadagi siyosiy va harbiy keskinlikka nisbatan xushyor bo‘lishni tavsiya qilgan.
“AQSh fuqarolariga ommaviy namoyishlardan qochish va favqulodda holat sodir bo‘lganda mamlakatni tark etishning mavjud rejalarini muntazam ko‘rib borish tavsiya etiladi”, — deyilgan xabarda.
Bir necha kun oldin AQSh Davlat departamenti Amerikaning Kiyevdagi elchixonasi xodimlarining bir qismi, shuningdek, barcha xodimlarning oilalari evakuatsiya qilinishini ma’lum qilgandi. Bundan tashqari, Davlat departamenti AQSh fuqarolarini Ukrainaga borishdan tiyilishga chaqirgan. Oradan ko‘p o‘tmay AQShning Kiyevdagi elchixonasi amerikaliklarni zudlik bilan Ukrainani tark etishga chaqirdi.
Mavzuga doir: “Ukraina — ‘Titanik’ emas”: Zelenskiy G‘arb diplomatlarining Ukrainadan evakuatsiya qilinishini xato deb atadi
Izoh (0)