Ijtimoiy tarmoqlarda IIB xodimlari mahallaning uyushgan jinoiy to‘daga aylangan fuqarolari tomonidan toshbo‘ron qilingani aytilgan video tarqaldi. Andijon viloyati IIB mazkur holatga munosabat bildirib, videodagi tasvirlar bo‘yicha mas’ul xodimlar tomonidan o‘rganish ishlari olib borilganini ma’lum qildi.
Aniqlanishicha, Baliqchi tumani “A’lam” MFYda yashovchi A.B. tuman “Suvoqova” tashkilotiga tegishli bo‘lgan suv qazib chiqarish inshooti va hududini o‘zining tomorqasiga noqonuniy qo‘shib, devor bilan o‘rab olgan. Agar suv inshooti nosoz holga kelsa, ta’mirlash uchun kelgan fuqarolarni bu hududga o‘tishga to‘sqinlik qilayotgani uchun mahalla aholisi bilan ushbu oila o‘rtasida nizo yuzaga kelgan.
Mazkur masala Fuqarolik ishlari bo‘yicha Izboskan tumani sudida o‘tgan 2021-yilning 28-may kuni ko‘rib chiqilib, mahalla aholisi foydasiga hal etilgan. Ushbu noqonuniy qurilgan binoni buzish uchun sud tomonidan muddat belgilangan. MIB hamda tuman mutasaddi rahbarlari tomonidan ushbu qarorga asosan A.B.ga noqonuniy qurilishni buzish kerakligi tushuntirilgan bo‘lsa-da, u tomonidan bunga qarshilik qilinib, devor buzilmagan.
2022-yilning 28-yanvar kuni Majburiy ijro byurosi xodimlari sud qaroriga asosan A.B.ning xonadoniga suv qudug‘i hududidagi noqonuniy qurilgan devorni buzish uchun ijroga borgan vaqtida A.B. va uning birga yashovchi o‘g‘li R.Sh. kelini Y.G. bilan mahalla aholisi o‘rtasida nizo kelib chiqib, oqibatda mahallada yashovchi bir necha fuqaro tomonidan A.B.ning devoriga tosh otilgan va bu holat darhol IIB xodimlari tomonidan bartaraf etilgan.
“Otilgan toshlar u yerda bo‘lgan IIB yoki boshqa mutasaddi tashkilot xodimlarga yoxud fuqarolarga qaratilmagan va ularga tegmagan. Mazkur holat yuzasidan Baliqchi tumani IIB tomonidan tergovga qadar tekshiruv harakatlari olib borilmoqda. Tekshiruv yakuniga ko‘ra, huquqbuzarlik sodir etgan shaxslar aniqlangan taqdirda, ularning xatti-harakatlariga huquqiy baho beriladi”, — deyiladi munosabatda.
Avvalroq Qashqadaryoda aliment qarzdorligini undirishga kelgan MIB xodimini temir bo‘lagi bilan urgan shaxsga jinoyat ishi qo‘zg‘atilgani to‘g‘risida xabar berilgandi.
Izoh (0)