Davlat xavfsizlik xizmatining Samarqand viloyati bo‘yicha boshqarmasi hamda viloyat IIB xodimlari tomonidan o‘tkazilgan tezkor tadbirda mahalliy fuqarolarni AQShga noqonuniy yuborilishi bilan bog‘liq holatga chek qo‘yildi. Bu haqda DXX axborot xizmati xabar qildi.
Qayd etilishicha, tezkor tadbir davomida Samarqand tumanida yashovchi shaxs (1990-yilda tug‘ilgan) 3 nafar fuqaroni O‘zbekiston—Rossiya—Turkiya—BAA—Buyuk Britaniya—Meksika—AQSh yo‘nalishi orqali Qo‘shma shtatlarga yuborish uchun ularning har biridan 20 ming dollar talab qilib, jami 60 ming dollarni olgan vaqtida ashyoviy dalillar bilan ushlandi.
Tekshiruv harakatlari davomida aniqlanishicha, fuqarolarga yo‘lga chiqishdan avval ularning har biri PZR test ma’lumotnomasiga va hisobida 5 ming dollar bo‘lgan viza kartaga ega bo‘lishi kerakligi tushuntirilgan.
Holat yuzasidan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, qonunbuzarning xorijiy davlatlardagi jinoiy aloqalariga aniqlik kiritish bo‘yicha zarur chora-tadbirlar ko‘rilmoqda.
Izoh (0)