Qashqadaryoda MIB xodimi faoliyatiga qarshilik ko‘rsatgan fuqaro qamoqqa olindi

Qashqadaryo viloyatining Qamashi tumanida MIB xodimining qonuniy faoliyatiga to‘sqinlik qilgan 29 yoshli fuqaro qamoqqa olindi. Bu haqda “Daryo”ga MIB viloyat boshqarmasi axborot xizmati rahbari Gulnoza Dilmurodova xabar berdi.

Ma’lum bo‘lishicha, byuroning Qamashi tuman bo‘limi ish yurituviga tuman ma’muriy sudining 2019-yil 29-oktabrdagi qaroriga asosan qarzdor N.Q.dan davlat foydasiga 669 ming so‘m ma’muriy jarima undirish to‘g‘risidagi ish kelib tushgan.

“Qarzdor ushbu ma’muriy jarimani oradan 2,5 yil vaqt o‘tgan bo‘lsa-da, to‘lamasdan kelgan. Shu sababli, davlat ijrochilari joriy yilning 24-may kuni tumanning Tegirmonqul qishlog‘ida joylashgan qarzdorning yashash manziliga borib, qarzdorlik evaziga bir dona Roison rusumli televizorini xatlab olgan. So‘ngra ushbu qishloq hududida boshqa ijro harakatlarini amalga oshirayotgan vaqtda ularning ortidan qarzdorning ukasi, onasi va kelinoyisi borib, MIB xodimlarini haqorat qilgan. Xatlab olingan televizorni qaytarib berishini aytib, janjal ko‘targan. Shuningdek, byuro xodimlari qaytib kelayotganda qarzdor va uning otasi yo‘lning qatnov qismida yog‘och narvon bilan MIB xodimlari boshqaruvida bo‘lgan Nexia-3 avtomashinasining oldini to‘sib, narvonni avtomashinaning old qismiga uloqtirgan hamda avtomashinani to‘xtatib olib, davlat ijrochilariga yengil tan jarohati yetkazgan”, — deydi Gulnoza Dilmurodova.

Aytilishicha, shundan so‘ng qarzdorning ukasi o‘zi bilan olib kelgan temir (lom) jismni ko‘rsatib, MIB xodimlariga ushbu jism bilan tan jarohati yetkazishini aytib, ularni qo‘rqitgan va xatlab olingan televizorni qaytarib olgan.

“Hodisa joyi Qamashi tuman prokuraturasi tergovchisi va tuman IIB tezkor xodimlari tomonidan ko‘zdan kechirilib, protsessual tartibda hujjatlar rasmiylashtirilgan. Holat yuzasidan tuman prokuraturasi tomonidan 2021-yil 26-may kuni qarzdor N.Q. va boshqalarga nisbatan Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish, qanday shaklda bo‘lmasin o‘zining xizmat vazifasini bajarish yoki fuqaroviy burchini bajarishdan voz kechishga, shuningdek, qonunga xilof harakatlar sodir etishga majbur qilish) bilan jinoyat ishi qo‘zg‘atilgan hamda N.Q. Jinoyat-protsessual kodeksining 221-moddasi tartibida ushlangan.

Eslatib o‘tamiz, mazkur modda bilan ayblangan fuqaroning aybi tasdiqlansa, u uch yilgacha axloq tuzatish ishlari yoki ikki yildan besh yilgacha ozodlikni cheklash yoki besh yilgacha ozodlikdan mahrum qilish bilan jazolanadi.