O‘zbekistonda birlamchi tibbiyot muassasalaridagi mavjud 26 turdagi jurnal hamda 33 turdagi hisobot shakllarining bir qismi amaliyotda keraksiz, degan xulosaga kelindi. Bu haqda SSV matbuot xizmati xabar berdi.
2021-yilning noyabr oxirlarida Sog‘liqni saqlash vazirligida Toshkent shahridagi bir guruh tibbiyot xodimlari bilan o‘tkazilgan uchrashuvda amaliyot uchun foydali bo‘lmagan, ortiqcha ovoragarchiliklarni keltirib chiqarayotgan hujjat va hisobot shakllarini qayta ko‘rib chiqish hamda qisqartirish yuzasidan mutasaddilarga topshiriqlar berilgandi.
Shu sababli amaliyot uchun foydali bo‘lmagan hujjat va hisobot shakllarini qisqartirish yuzasidan maxsus ishchi guruh tuzilgan edi. O‘tgan qisqa vaqt ichida vazirlik tomonidan tuzilgan ishchi guruh bu boradagi vaziyatni chuqur o‘rganib, mavjud 26 turdagi jurnal hamda 33 turdagi hisobot shakllaridan bir qismi amaliyotda keraksiz, degan xulosaga kelgan.
Masalan, aholi juda ko‘p murojaat qilgan pallalarda qabul bo‘limi hamshirasining ambulator-poliklinika muassasasiga kelganlarni qayd etish jurnalini to‘ldirishi juda ko‘p vaqt yo‘qotilishiga, oqibatda odamlarning haqli e’tirozlariga sabab bo‘lib kelgan. Bemorlar qabul bo‘limidan ro‘yxatdan o‘tgach, shifokor huzuriga kirish uchun yana ro‘yxatga yozilishi zarur edi.
Tibbiyot xodimlarining jarohat holatlarini qayd qilish jurnaliga esa noxush vaziyatlar yuz bermasa, oylab, hatto yillab ehtiyoj bo‘lmasligi mumkin. Lekin hamshira ana shu hujjat turiga har kuni “Bugun ko‘ngilsiz holatlar sodir bo‘lmadi” degan mazmundagi qaydlarni kiritib borishi shart edi.
Shuningdek, oilaviy poliklinikaning muolaja hamshirasi har bir bemorga “ukol” qilgach, buni bir nechta blankalar, hatto maxsus jurnalga ham “falon dona shpris, falon gramm spirt, falon gramm paxta ishlatildi” degan ma’lumotlar bilan yozib borishi lozim edi. Bu esa boshqa bemorlarning uzoq kutib qolishiga sabab bo‘lib kelgan.
“Ana shunday noxush holatlarga chek qo‘yish maqsadida sog‘liqni saqlash vazirining tegishli buyrug‘i qabul qilindi. Unga ko‘ra, shu yil 1-fevraldan ko‘p tarmoqli markaziy poliklinika, oilaviy poliklinika va oilaviy shifokor punktlarida yuritiladigan 26 turdagi tibbiy hisob jurnallaridan 14 tasi qoldirildi. Qolgan 14 tasidan 10 tasi soddalashtirildi. 33 turdagi tibbiy karta va blankalar esa 14 tagacha qisqartirildi”, — deyiladi xabarda.
Avvalroq prezident Shavkat Mirziyoyev yig‘ilishda sog‘liqni saqlash tizimi haqida gapirar ekan, vazir Behzod Musayevga, eng avvalo, pastga tushib ishlash kerakligini ta’kidlagandi.
Mavzuga doir:
- Behzod Musayev yarim tunda Toshkent shahar tez yordam xizmati faoliyatini o‘rgandi
- O‘zbekiston SSV markaziy apparati xodimlarining 40 foizi vazifasidan ozod etildi
- Behzod Musayev SSV tizimidagi talabga javob bermaydigan barcha sanitariya-gigiyena xonalarini ta’mirdan chiqarish bo‘yicha ko‘rsatma berdi
Izoh (0)