Ijtimoiy tarmoqlarda Samarqand shahrida bir yigit ko‘chada ketayotgan kishini tepgani tasvirlangan video tarqalgan edi. Samarqand viloyati IIBning ma’lum qilishicha, voyaga yetmagan yigitlarning shaxsi aniqlanib, ularning ota-onalariga nisbatan tegishli chora ko‘rilgan.
Ma’lum qilinishicha, Samarqand shahri bo‘yicha IIO FMB tomonidan olib borilgan tezkor surishtiruv ishlari natijasida videodagi holatni sodir etgan va uni tasvirga olgan yigitlar topilgan — ular Samarqand shahridagi 45-maktabning 8-sinf o‘quvchilari.
“Kompyuterxonaga ketayotgandik. O‘rtog‘im A. menga videoga ol deb aytdi. Nega videoga olishimni so‘radim. U esa keyin ko‘rasan deya, o‘sha kishini tepdi”, — deydi holatni tasvirga olgan yigitcha.
Uning so‘zlariga ko‘ra, oradan besh kun o‘tgach, u videoni Telegram orqali tarqatgan.
“24-yanvar kuni 19:00 larda do‘stim bilan paynetga borayotganimda yoshi katta insonni ko‘rdim. Shuni borib tepdim, qilgan ishimdan pushaymonman”, — deydi yigit.
Holat yuzasidan tergovga qadar tekshiruv harakatlari olib borilib, ikki nafar voyaga yetmagan shaxslarning ota-onalariga nisbatan Ma’muriy javobgarlik to‘g‘risidagi kodeksning 47-moddasiga ko‘ra (bolalarni tarbiyalash va ularga ta’lim berish borasidagi majburiyatlarni bajarmaslik) bayonnomalar rasmiylashtirilgan. Voyaga yetmagan bolalarning o‘zlariga nisbatan esa Respublika o‘g‘il bolalar ta’lim-tarbiya muassasasiga joylashtirishlik uchun jinoyat ishlari bo‘yicha Samarqand shahar sudiga iltimosnoma kiritilgan.
Hozirda ular vaqtinchalik saqlash uchun Samarqand viloyatidagi voyaga yetmaganlarga ijtimoiy-huquqiy yordam ko‘rsatish markaziga joylashtirilgan.
Avvalroq Namanganda 21 yoshli reperni pichoqlab o‘ldirgan tiktoker 17 yilga qamalgani to‘g‘risida xabar berilgandi.
Izoh (0)