Toshkent shahrida 30-yanvar kuni ishiga mas’uliyatsizlik bilan yondashgan metropoliten xodimlariga chora ko‘rildi, deb xabar bermoqda metropoliten axborot xizmati.
Qayd etilishicha, shu kuni Toshkent metropolitenining Sergeli-1 bekatida tungi navbatchilikni qabul qilish vaqtida bekat navbatchisi M.M. va farrosh M.S. ish joyiga spirtli ichimlik iste’mol qilgan holda kelgan. Vaziyatga aniqlik kiritilishicha, M.M hamda katta operator G.I. farrosh M.S.ning tug‘ilgan kunini nishonlash maqsadida ish vaqtidan avval kafega borgan va M.M. va M.S. spirtli ichimlik iste’mol qilgan. Tibbiy ekspertiza xulosasiga ko‘ra, bu hol o‘z tasdig‘ini topgan.
Mehnat intizomini qo‘pol ravishda buzganligi uchun M.M. va M.S. bilan tuzilgan mehnat shartnomalari bekor qilingan. Katta operator G.I. esa M.M. va M.S. spirtli ichimlik iste’mol qilib ish joyiga kelgani, bu holat metropolitenda harakat xavfsizligiga raxna solishi va fojia bilan tugashi mumkinligini bila turib, rahbariyatga ma’lum qilmagani uchun unga nisbatan hayfsan intizomiy jazosi qo‘llangan.
Izoh (0)