Саркисяннинг Арманистон президентлигидан истеъфога чиқиш тўғрисидаги аризаси кучга кирди

Арманистон президенти Армен Саркисян расман истеъфога чиқди. Мамлакат қонунларига кўра, давлат раҳбари ўз аризасини етти кун давомида қайтариб олмаса, у кучга киради, деб хабар беради «Коммерсантъ».

Саркисян истеъфога чиқишини 23 январь куни эълон қилганди. У давлат раҳбарлигидан кетаётганини мамлакат сиёсати, уруш ва тинчлик масалаларига таъсир ўтказа олмаётгани билан изоҳлаган. Президентнинг мажбуриятларини вақтинча Миллий йиғин спикери Ален Симонян бажариб туради.

ОАВ маълумотларига кўра, мамлакатдаги «Фуқаролик келишуви» ҳукмрон партияси президентлик лавозимига юқори технологиялар саноати вазири Ваагн Хачатрян номзодини илгари суради.

Саркисян 2018 йилда парламент томонидан давлат раҳбари этиб сайланган эди. 2015 йилдаги конституциявий ислоҳотлардан сўнг мамлакат парламентли бошқарув шаклига ўтди. Янги шаклда президент фақат вакиллик ваколатларига эга, унинг ўзи парламент томонидан етти йил муддатга сайланади. Саркисян — дипломат, 1996—1997 йилларда Арманистон ҳукуматини бошқарган, унинг номзоди ўша пайтдаги ҳукмрон Арманистон партияси фракциялари ва унинг коалициядаги ҳамкори — сўл миллатчи «Дашнаксутюн» партияси томонидан кўрсатилган.

Аввалроқ «Порлоқ Арманистон» партияси раҳбари Эдмон Марукян ва ташқи ишлар вазири Арарат Мирзоян Арманистон президентлиги лавозимига даъвогарлик қилиши мумкинлиги тўғрисида хабар берилганди. «Арманистон» мухолифат фракциясидан бўлган парламент депутати Андраник Теванян Саркисян республикадан чиқиб кетганини маълум қилган. Қатор арман ОАВлари у Лондонда эканини ёзмоқда.