Buxoroda beshta tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari almashdi. Avvalgi o‘rinbosarlarning aksariyati o‘z arizasiga ko‘ra egallab turgan lavozimidan ozod etilgan. Bu haqda “Daryo” muxbiri xabar bermoqda.
Viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Mirali Hamroyevning ta’kidlashicha, prezidentning 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida”gi qarori, nafaqat mahallalarda joriy etilgan yoshlar yetakchilaridan, balki tuman hokimi o‘rinbosarlaridan ham yoshlarning ijtimoiy hayotiga daxldorlik va javobgarlikni oshiradi.
“Shu nuqtayi nazardan, beshta tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari o‘zgardi. Ushbu lavozimlarga ko‘p sonli yoshlar mas’uliyatini torta oladigan yosh kadrlar saralandi”, — deydi Mirali Hamroyev.
Xususan, Jondor tumani hokimiga yangi o‘rinbosar etib hozirga qadar tuman hokimligi apparati tashkiliy-kadrlar guruhi rahbari vazifasida ishlab kelayotgan Niyoz Ahmatov tayinlangan.
Niyoz Ahmatov 1990-yilda Jondor tumanida tug‘ilgan. Oliy ma’lumotli. Buxoro davlat universiteti hamda Buxoro muhandislik texnologiya institutini tamomlagan. Ayni kunga qadar ushbu lavozimda Mansur Muhammedov faoliyat yuritib kelgan. U o‘z arizasiga binoan lavozimidan ozod qilingan.
Qorovulbozor tumani hokimiga yangi o‘rinbosar etib viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari kotibiyati yetakchi mutaxassisi vazifasida ishlab kelgan Said Qo‘shshayev tayinlangan.
Said Qo‘shshayev 1990-yilda Buxoro shahrida tug‘ilgan. Oliy ma’lumotli. Buxoro davlat universitetini bitirgan. Ilk mehnat faoliyatini 2015-yilda sobiq “Kamolot” yoshlar ijtimoiy harakati Buxoro shahar kengashidan boshlagan. Avvalroq Qorovulbozor tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari vazifasida ishlagan Shavkat Rahmonov viloyat madaniyat boshqarmasi boshlig‘i etib tayinlangan edi.
Kogon shahar hokimiga yangi o‘rinbosar etib Sherzod Tilavov tayinlangan.
Sherzod Tilavov 1987-yilda Buxoro shahrida tug‘ilgan. Oliy ma’lumotli. Buxoro oziq-ovqat va yengil sanoat texnologiyasi instituti hamda O‘zbekiston prezidenti huzuridagi Davlat boshqaruvi akademiyasini tamomlagan. Mehnat faoliyatini 2009-yilda Termiz shahri “Surxon-Termiz silk” pillani qayta ishlash fabrikasida boshlagan. Sherzod Tilavov tayinlovga qadar O‘zbekiston yoshlar ittifoqi Buxoro viloyat kengashi raisi vazifasida ishlab kelayotgan edi. Ushbu lavozimda hozirga qadar Azamat Eshov faoliyat yuritib kelgan. Azamat Eshov viloyat tibbiy-ijtimoiy xizmatlarni rivojlantirish boshqarmasi boshlig‘i etib tayinlangan.
Buxoro tumani hokimi birinchi o‘rinbosarligiga Umid Rajabov tayinlangan.
Umid Rajabov 1983-yil Buxoro tumanida tug‘ilgan. Oliy ma’lumotli. Andijon davlat universitetini tamomlagan. Ish faoliyatini 2005-yilda tuman hokimligi iqtisodiyot bo‘limi yetakchi mutaxassisligidan boshlab, yoshlar tashkilotining tuman kengashi raisi lavozimida davom ettirgan. U tayinlovga qadar Romitan tumani davlat soliq inspeksiyasi boshlig‘i sifatida faoliyat ko‘rsatgan. Ayni kunga qadar ushbu lavozimda Sobir Bozorov faoliyat yuritib kelgan. U o‘z arizasiga binoan lavozimidan ozod qilingan.
Shofirkon tumani hokimi o‘rinbosari lavozimiga tuman mahalla va oilani qo‘llab-quvvatlash bo‘limi boshlig‘i vazifasida faoliyat yuritib kelayotgan Akmal Qazoqov tayinlangan.
Akmal Qazoqov 1987-yilda Shofirkon tumanida tug‘ilgan. Oliy ma’lumotli. Buxoro muhandislik texnologiya institutini tamomlagan. Mehnat faoliyatini 2006-yilda Buxoro davlat universiteti huzuridagi axborot texnologiyalari akademik litseyi texnik operatorligidan boshlagan. Ushbu lavozimda hozirga qadar Said Hamroyev ishlab kelgan. Said Hamroyev o‘z arizasiga binoan lavozimdan ozod qilingan.
Avvalroq Farg‘ona shahriga yangi hokim tayinlangani, Toshkentning Yunusobod tumani hokimi o‘zgargani, Jizzax viloyati prokurorining o‘rinbosari Paxtakor tumaniga hokim bo‘lgani, Farg‘ona viloyatining Bag‘dod tumaniga yangi hokim tayinlangani to‘g‘risida xabar berilgandi.
Izoh (0)