Ijtimoiy tarmoqlarda Buxoro shahridagi “Chor Minor” madrasasi obyekti hududida qo‘yxona tashkil etilgani tasvirlangan video tarqaldi. Buxoro viloyati Madaniy meros boshqarmasi mazkur holatga munosabat bildirib, videoda aks etgan holat haqiqatga to‘g‘ri kelmasligini ma’lum qildi.
Ijtimoiy tarmoqlarda tarqalgan videoda madrasa hududida bir nechta qo‘ylar borligi va ularni saqlash uchun qo‘yxona qurilgani tasvirlangan. Idora matbuot xizmatining ma’lum qilishicha, vaziyat 27-yanvar kuni mutasaddi tashkilotlar, jamoatchilik va shu hududda yashovchi aholi bilan birgalikda joyiga chiqqan holda o‘rganilgan.
O‘rganish natijasiga ko‘ra, “Chor Minor” madrasasi va uning atrofidagi hudud ayni paytda ozoda ekani, bu yerda hech qanday qo‘yxona mavjud emasligi va videoda aks etgan holat haqiqatga to‘g‘ri kelmasligi ma’lum bo‘lgan.
“Chor Minor” madrasasi joylashgan “Alisher Navoiy” mahalla fuqarolar yig‘ini raisi Shahnoza Kamolovaning so‘zlariga ko‘ra, ayol ikki yarim yildan buyon ushbu mahallada ishlab kelmoqda va bu davr ichida ko‘rsatilgan joyda qo‘yxona mavjud bo‘lmagan, videodagi holat uch yil oldin kuzatilgan.
Ta’kidlanishicha, mazkur hududning ozoda va tartibli saqlanishi bo‘yicha fuqaro Mansur Safarov mas’ul etib biriktirilgan. Mahalliy aholi ham ayolning gaplarini tasdiqlagan.
“Blogerlardan ulug‘ ajdodlarimizdan bizgacha yetib kelgan obidalarning nufuziga salbiy ta’sir etishi va shu joyda yashovchi aholining qadr-qimmatini oyoqosti qilishi mumkin bo‘lgan, haqiqatga zid xabarlarni tarqatmaslikka va bu yo‘nalishda to‘g‘ridan to‘g‘ri hamkorlik qilishga chaqiramiz”, — deyiladi munosabatda.
Shuningdek, viloyat Madaniy meros boshqarmasi O‘zbekiston qonunchiligida har qanday asoslanmagan ma’lumotni tarqatishga sababchi bo‘lgan shaxslarga nisbatan tegishli choralar ko‘rilishi belgilangani, bunga amal qilmay, asossiz ma’lumotlar tarqatuvchi shaxslarning ishi huquqni muhofaza qilish organlariga taqdim etilishini eslatib o‘tgan.
Avvalroq “Xo‘ja Porso” masjidi buzib tashlangani bo‘yicha ish tergov uchun Bosh prokuraturaga yuborilgani, Buxoro amiri Sayid Abdulahadxonning xaroba holga kelib qolgan yozgi qarorgohini restavratsiya qilishga 3,1 milliard so‘m ajratilishi, Buxoro prokuraturasi devorining bir qismi o‘pirilib tushgan “Abdullaxon” madrasasi bo‘yicha jinoyat ishi qo‘zg‘atgani to‘g‘risida xabar berilgandi.
Izoh (0)