O‘zbekistonda xalq ta’limi tizimidagi barcha maktablarga oid ma’lumotlar yagona platformaga birlashtiriladi

Xalq ta’limi tizimida ma’lumotlar almashuvini avtomatlashtirish va boshqarish maqsadida yagona dasturiy kompleks — ERP axborot tizimi ishlab chiqilib, amalda keng joriy etish bo‘yicha ishlar amalga oshirilmoqda, deb xabar berdi Xalq ta’limi vazirligi.

Enterprise Resource Planning – tashkilot yoki muassasaning mavjud bo‘lgan resurslari hamda jarayonlarni rejalashtirish va boshqarish degan ma’noni anglatadi.

Xalq ta’limi tizimida bu tizim amaldagi jarayonlarni avtomatlashtirish, hujjat almashinuvlarini elektronlashtirish, tizim xodimlariga raqamlashtirish orqali qator yengilliklar yaratish, davlat budjet mablag‘lari ortiqcha sarflanishining oldini olish, inson omilini kamaytirish, ish haqi va unga tenglashtirilgan to‘lovlarni to‘lash jarayonida yuzaga kelishi mumkin bo‘lgan xato va kamchiliklarni bartaraf etish hamda ma’lumot almashinuvida shaffoflikni ta’minlash maqsadida joriy etilmoqda.

Ma’lum qilinishicha, ERP platformasi 1-sinfga qabul jarayonida o‘quvchilar ro‘yxatini elektron shakllantirish, o‘quv soatlarini belgilash, pedagoglarga soat biriktirish, malaka toifalarini monitoring qilish, xodimlarga ish haqini belgilash, tabel hisobini olib borish kabi bir qator qulayliklarni taqdim etadi.

Xalq ta’limi vazirligi mutasaddilari, umumta’lim maktablari boshqaruv xodimlari dasturiy majmuaning asosiy foydalanuvchilari hisoblanadi. ERP tizimi boshqa vazirlik va davlat idoralarining axborot tizimlari hamda ma’lumot bazalari bilan integratsiya qilinmoqda.

“Bugungi kunda xalq ta’limi tizimidagi 10 mingdan ortiq umumta’lim maktablarini ERP’ga ulash bo‘yicha ishlar olib borilmoqda. Endilikda mazkur maktablardagi 700 mingdan ortiq xodim va 6,2 million nafardan ziyod o‘quvchiga oid ma’lumotlarni ushbu platforma orqali onlayn yuritilishi to‘liq yo‘lga qo‘yiladi”, — deyiladi xabarda.

Avvalroq O‘zbekistonda kelgusi besh yilda maktablarda qo‘shimcha 1,2 mln o‘quvchi o‘rni yaratilib, darsliklar yangilangani, O‘zbekistonda har yili maktablarda xorijiy tillarni rivojlantirish uchun budjetdan kamida 1 mlrd so‘m ajratilishi to‘g‘risida xabar berilgandi.