Бухорода бешта туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарлари алмашди. Аввалги ўринбосарларнинг аксарияти ўз аризасига кўра эгаллаб турган лавозимидан озод этилган. Бу ҳақда «Дарё» мухбири хабар бермоқда.
Вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Мирали Ҳамроевнинг таъкидлашича, президентнинг 2022 йил 19 январдаги «Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида»ги қарори, нафақат маҳаллаларда жорий этилган ёшлар етакчиларидан, балки туман ҳокими ўринбосарларидан ҳам ёшларнинг ижтимоий ҳаётига дахлдорлик ва жавобгарликни оширади.
«Шу нуқтаи назардан, бешта туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарлари ўзгарди. Ушбу лавозимларга кўп сонли ёшлар масъулиятини торта оладиган ёш кадрлар сараланди», — дейди Мирали Ҳамроев.
Хусусан, Жондор тумани ҳокимига янги ўринбосар этиб ҳозирга қадар туман ҳокимлиги аппарати ташкилий-кадрлар гуруҳи раҳбари вазифасида ишлаб келаётган Ниёз Аҳматов тайинланган.
Ниёз Аҳматов 1990 йилда Жондор туманида туғилган. Олий маълумотли. Бухоро давлат университети ҳамда Бухоро муҳандислик технология институтини тамомлаган. Айни кунга қадар ушбу лавозимда Мансур Муҳаммедов фаолият юритиб келган. У ўз аризасига биноан лавозимидан озод қилинган.
Қоровулбозор тумани ҳокимига янги ўринбосар этиб вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари котибияти етакчи мутахассиси вазифасида ишлаб келган Саид Қўшшаев тайинланган.
Саид Қўшшаев 1990 йилда Бухоро шаҳрида туғилган. Олий маълумотли. Бухоро давлат университетини битирган. Илк меҳнат фаолиятини 2015 йилда собиқ «Камолот» ёшлар ижтимоий ҳаракати Бухоро шаҳар кенгашидан бошлаган. Аввалроқ Қоровулбозор туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари вазифасида ишлаган Шавкат Раҳмонов вилоят маданият бошқармаси бошлиғи этиб тайинланган эди.
Когон шаҳар ҳокимига янги ўринбосар этиб Шерзод Тилавов тайинланган.
Шерзод Тилавов 1987 йилда Бухоро шаҳрида туғилган. Олий маълумотли. Бухоро озиқ-овқат ва енгил саноат технологияси институти ҳамда Ўзбекистон президенти ҳузуридаги Давлат бошқаруви академиясини тамомлаган. Меҳнат фаолиятини 2009 йилда Термиз шаҳри «Сурхон-Термиз силк» пиллани қайта ишлаш фабрикасида бошлаган. Шерзод Тилавов тайинловга қадар Ўзбекистон ёшлар иттифоқи Бухоро вилоят кенгаши раиси вазифасида ишлаб келаётган эди. Ушбу лавозимда ҳозирга қадар Азамат Эшов фаолият юритиб келган. Азамат Эшов вилоят тиббий-ижтимоий хизматларни ривожлантириш бошқармаси бошлиғи этиб тайинланган.
Бухоро тумани ҳокими биринчи ўринбосарлигига Умид Ражабов тайинланган.
Умид Ражабов 1983 йил Бухоро туманида туғилган. Олий маълумотли. Андижон давлат университетини тамомлаган. Иш фаолиятини 2005 йилда туман ҳокимлиги иқтисодиёт бўлими етакчи мутахассислигидан бошлаб, ёшлар ташкилотининг туман кенгаши раиси лавозимида давом эттирган. У тайинловга қадар Ромитан тумани давлат солиқ инспекцияси бошлиғи сифатида фаолият кўрсатган. Айни кунга қадар ушбу лавозимда Собир Бозоров фаолият юритиб келган. У ўз аризасига биноан лавозимидан озод қилинган.
Шофиркон тумани ҳокими ўринбосари лавозимига туман маҳалла ва оилани қўллаб-қувватлаш бўлими бошлиғи вазифасида фаолият юритиб келаётган Акмал Қазоқов тайинланган.
Акмал Қазоқов 1987 йилда Шофиркон туманида туғилган. Олий маълумотли. Бухоро муҳандислик технология институтини тамомлаган. Меҳнат фаолиятини 2006 йилда Бухоро давлат университети ҳузуридаги ахборот технологиялари академик лицейи техник операторлигидан бошлаган. Ушбу лавозимда ҳозирга қадар Саид Ҳамроев ишлаб келган. Саид Ҳамроев ўз аризасига биноан лавозимдан озод қилинган.
Аввалроқ Фарғона шаҳрига янги ҳоким тайинлангани, Тошкентнинг Юнусобод тумани ҳокими ўзгаргани, Жиззах вилояти прокурорининг ўринбосари Пахтакор туманига ҳоким бўлгани, Фарғона вилоятининг Бағдод туманига янги ҳоким тайинлангани тўғрисида хабар берилганди.
Изоҳ (0)