O‘zbekiston aholisi 2021-yilda doimiy yashash uchun asosan qaysi davlatlarga ko‘chib ketgani ma’lum qilindi

Davlat statistika qo‘mitasi 2022-yil 1-yanvar holatiga ko‘ra, O‘zbekistondagi asosiy demografik ko‘rsatkichlarni e’lon qildi.

Ma’lumotlarga ko‘ra, 2021-yilda O‘zbekistondan xorijiy mamlakatlarga doimiy yashash uchun ko‘chib ketganlar 20 140 kishini tashkil etgan.

O‘zbekistondan xorijiy mamlakatlarga ko‘chib ketganlarning asosiy qismi Qozog‘iston (jami xorijdan ko‘chib kelganlarga nisbatan 56,6 foiz), Rossiya (30,5 foiz), Tojikiston (3,7 foiz), Qirg‘iziston (2,3 foiz), Ukraina (1,6 foiz) va boshqa mamlakatlar (5,3 foiz) hissasiga to‘g‘ri kelgan.

Shu bilan birga, o‘tgan yili xorijdan 1,9 ming kishi O‘zbekistonga ko‘chib kelgan.

O‘zbekistonga xorijiy mamlakatlardan ko‘chib kelganlarning asosiy qismi Qozog‘iston (jami xorijdan ko‘chib kelganlarga nisbatan 38 foiz), Tojikiston (18,5 foiz), Rossiya (17,3 foiz), Qirg‘iziston (7,0 foiz), Turkmaniston (3,3 foiz) va boshqa mamlakatlar (15,9 foiz) hissasiga to‘g‘ri kelgan.

Ma’lumot uchun, 2020-yilda O‘zbekistonni 13,6 ming fuqaro tark etgan bo‘lsa, 1,1 ming kishi ko‘chib kelgan.

Ta’kidlash kerakki, O‘zbekistondan 2000-yildan 2020-yilgacha 1 107 854 nafar fuqaro xorijiy davlatlarga doimiy yashash uchun chiqib ketgan. 20 yil ichida mamlakatga ko‘chib kelgan xorijliklar soni 11 baravar kam — 99 341 kishini tashkil etgan.