Berdimuhamedov bobosi nomidagi harbiy maktab quriladigan joyga kapsula qo‘ydi

27-yanvar kuni Turkmaniston prezidenti Gurbanguli Berdimuhamedov Vatan himoyachilari kuniga bag‘ishlangan tantanali marosimda ishtirok etdi, deb xabar beradi “Xronika Turkmenistana”.

Marosim avvalida Markaziy ofitserlar uyida kuch tuzilmalari shaxsiy tarkibida namunali xizmat ko‘rsatgan xodimlarga davlat mukofotlarini topshirish marosimi bo‘lib o‘tgan. Mukofotlash to‘g‘risidagi qarorni Davlat xavfsizlik kengashi kotibi Charimirat Amanov o‘qigan.

Amanov, shuningdek, prezidentdan Berdimuhamed Annayev nomidagi harbiy maktabning yangi binosi poydevoriga qo‘yiladigan kapsulaga maktub yozishni so‘ragan.

Shundan so‘ng davlat rahbari yangi harbiy maktab binolari quriladigan majmua hududiga borgan va chizmalar bilan tanishgan. Prezident taqdim etilgan loyihalar bo‘yicha o‘z mulohazalari va tuzatishlarini kiritgan, biroq shundan keyin darhol “kapsulani qo‘ygan va belkurakda uning poydevoriga birinchi beton qorishmani tashlagan”.

Ma’lumotlarga ko‘ra, 700 o‘ringa mo‘ljallangan maktab Saparmurat Turkmanboshi va Atamurat Niyozov ko‘chalari chorrahasida quriladi. Harbiy ta’lim dargohini qurish bilan Turkiyaning Rönesans Endüstri Tesisleri Inşaat Sanayi ve Ticaret A.Ş. Ее kompaniyasi shug‘ullanmoqda va uni 2024-yilning avgustida ochish rejalashtirilgan.

Avvalroq Gurbanguli Berdimuhamedov Toshhovuzda qurilayotgan elektr tarmog‘i va parrandachilik fermasini ko‘zdan kechirgani va fermada unga bag‘ishlab doston kuylashgani to‘g‘risida xabar berilgandi. Shuningdek, yanvar o‘rtalarida Berdimuhamedov Bolqon viloyatida bo‘lgan, bu yerda mahalliy baliqchilar bilan uchrashgan, ular Turkmaniston davlat rahbariga baxtli turmush kechirayotganliklarini hikoya qilib unga bag‘ishlangan qo‘shiqni kuylashgandi.