2022-yilda sayohat qilish uchun eng xavfli mamlakat sifatida Venesuela tan olindi. Bu haqda turli davlatlardagi jinoyatchilik statistikasini taqqoslovchi Numbeo tahliliy servisi ma’lumotlarida keltirilgan. Hisobotning to‘liq ro‘yxati bilan tashkilotning rasmiy sayti orqali tanishish mumkin.
Mutaxassislarning ma’lumotlariga ko‘ra, Venesuelada jinoyatchilik indeksi 83,58 ballni tashkil etmoqda, xavfsizlik indeksi esa mos ravishda 16,42 ballga teng. Antireytingdan ikkinchi o‘rinni Papua-Yangi Gvineya egallagan — mamlakatdagi jinoyatchilik indeksi 81 ballga baholangan. Undan keyingi o‘rinni Afg‘oniston (77 ball) va Janubiy Afrika (76 ball) band etgan.
Bundan tashqari, Gonduras (74,1 ball), Trinidad va Tobago (71,3 ball), Gayana (68,9 ball), Salvador (68,6 ball), Yamayka (67,8 ball) ham sayyohlar uchun xavfli mamlakatlar qatoriga kiritilgan. Top-10 ro‘yxatga turistlar maksimal darajada ehtiyot bo‘lishi kerak bo‘lgan Suriya kiritilgan — 67,4 ball. O‘zbekiston esa 33,76 ball bilan reytingning 105-pog‘onasini egallagan.
Avvalroq Numbeo portali yashash uchun eng qimmat va eng arzon mamlakatlar 2022-yilgi reytingini e’lon qilgandi. Ro‘yxatning dastlabki uchta pog‘onasidan Bermud orollari (146,04), Shveysariya (123,35) va Norvegiya (100,9) egallagan bo‘lsa, oxirgi o‘rinlarni Hindiston (24,43), Afg‘oniston (20,37) hamda Pokiston (19,92) band etgan.
Izoh (0)