27 январь куни Туркманистон президенти Гурбангули Бердимуҳамедов Ватан ҳимоячилари кунига бағишланган тантанали маросимда иштирок этди, деб хабар беради «Хроника Туркменистана».
Маросим аввалида Марказий офицерлар уйида куч тузилмалари шахсий таркибида намунали хизмат кўрсатган ходимларга давлат мукофотларини топшириш маросими бўлиб ўтган. Мукофотлаш тўғрисидаги қарорни Давлат хавфсизлик кенгаши котиби Чаримират Аманов ўқиган.
Аманов, шунингдек, президентдан Бердимуҳамед Аннаев номидаги ҳарбий мактабнинг янги биноси пойдеворига қўйиладиган капсулага мактуб ёзишни сўраган.
Шундан сўнг давлат раҳбари янги ҳарбий мактаб бинолари қуриладиган мажмуа ҳудудига борган ва чизмалар билан танишган. Президент тақдим этилган лойиҳалар бўйича ўз мулоҳазалари ва тузатишларини киритган, бироқ шундан кейин дарҳол «капсулани қўйган ва белкуракда унинг пойдеворига биринчи бетон қоришмани ташлаган».
Маълумотларга кўра, 700 ўринга мўлжалланган мактаб Сапармурат Туркманбоши ва Атамурат Ниёзов кўчалари чорраҳасида қурилади. Ҳарбий таълим даргоҳини қуриш билан Туркиянинг Rönesans Endüstri Tesisleri Inşaat Sanayi ve Ticaret A.Ş. Ее компанияси шуғулланмоқда ва уни 2024 йилнинг августида очиш режалаштирилган.
Аввалроқ Гурбангули Бердимуҳамедов Тошҳовузда қурилаётган электр тармоғи ва паррандачилик фермасини кўздан кечиргани ва фермада унга бағишлаб достон куйлашгани тўғрисида хабар берилганди. Шунингдек, январь ўрталарида Бердимуҳамедов Болқон вилоятида бўлган, бу ерда маҳаллий балиқчилар билан учрашган, улар Туркманистон давлат раҳбарига бахтли турмуш кечираётганликларини ҳикоя қилиб унга бағишланган қўшиқни куйлашганди.
Мавзуга доир:
- Бердимуҳамедов Ахал вилоятининг маъмурий марказини қуриш якунланганини маълум қилди. У 2022 йилда очилади
- Мактаблар, ёритиш тизимлари, омикрон ва картошка. Туркманистон президенти 2022 йилдаги илк ишчи йиғилишини ўтказди
- Бердимуҳамедов янги туғилган қулунга «Замон» лақабини берди ва йилқичиликни ривожлантиришга маблағ ажратишни буюрди
Изоҳ (0)