Janubiy Afrikaga yopirilgan Ana tropik sikloni yuzaga keltirgan suv toshqinlari oqibatida 70 dan ortiq odam halok bo‘ldi, deb xabar beradi BBC. Shuningdek, yana 130 ming kishi o‘z uylarini tark etishga majbur bo‘lgan.
Kuchli yog‘ingarchilik ayrim tumanlarda siklondan keyin ham davom etgan. Bu esa o‘z navbatida suv toshqinlarini yuzaga keltirgan.
Madagaskarda kamida 48 kishi halok bo‘lgan, 130 ming kishi o‘z uylarini tark etgan. Poytaxt Antananarivudagi maktab va sport zallari uyidan ko‘chishga majbur bo‘lgan fuqarolar uchun boshpanaga aylangan.
Malavida kamida 11 kishi halok bo‘lgani aytilmoqda. Butun mamlakat bo‘ylab elektr energiyasi ta’minoti uzilgan, ayrim tumanlarda esa tabiiy ofat xavfi e’lon qilingan.
Shuningdek, Mozambikda 18 kishi halok bo‘lgani ma’lum qilindi. Ammo rasmiylarning so‘zlariga ko‘ra, qurbonlarning aniq soni hamon noma’lum: suv toshqinlari oqibatida jami 20 ming kishi jabr ko‘rgan.
Mozambik bosh vaziri Karlos Agostinyo du Rosario xalqaro hamjamiyatlarni yordamga chaqirgan. YuNISEF mamlakatga o‘z xodimlarini yuborib, mamlakatda gumanitar yordamga muhtoj 45 ming kishiga ko‘mak berishini ma’lum qilgan.
Shu bilan birga, mintaqadagi meteoxizmatlar yaqin kunlarda Hind okeanida yana bir bo‘ron paydo bo‘lishi mumkinligidan ogohlantirmoqda.
Eslatib o‘tamiz, 2021-yil dekabr boshlarida Braziliyada suv toshqini tufayli 7 kishi halok bo‘lgan, minglab odamlar evakuatsiya qilingan edi. Shuningdek, dekabrda Malayziyada yirik suv toshqinlari yuz berib, 25 mingdan ortiq odam evakuatsiya qilingan. Yanvar o‘rtalarida esa Rossiyaning Saxalin viloyatidagi qor sikloni sovuq shamollar va bo‘ron olib kelgan.
Izoh (0)