Ukraina Milliy gvardiyasida xizmat qilayotgan muddatli harbiy xizmatchi Dneprdagi “Yujmash” janubiy mashinasozlik zavodi hududida o‘z hamkasblariga qarata o‘t ochdi, deb xabar bermoqda Ukraina Ichki ishlar vazirligi.
Hujum oqibatida besh kishi halok bo‘lgan, ulardan biri shifoxonada jon bergan. Yana besh kishi jarohatlangan. Ularning ahvoliga oydinlik kiritilmagan.
Keyinroq politsiya qurbonlar orasida to‘rt nafar harbiy xizmatchi va bir fuqaro borligini ma’lum qildi.
Otishma mahalliy vaqt bilan taxminan soat 03:40 da (Toshkent vaqti bilan 06:40), harbiylar qurollarini ombordan olayotgan paytda sodir bo‘lgan. “Informator”ning harbiylarga tayanib, yozishicha, askar qurol-yarog‘ omboriga kirib, pulemyot va patronlarni olgach, hamkasblariga qarata o‘q otishni boshlagan. Omborda 22 kishi bo‘lgan, ulardan ikki nafari tashqariga yugurib chiqib, politsiya va tez yordamni chaqirgan, deyiladi nashr xabarida.
Politsiya ma’lumotlariga ko‘ra, otishmani sodir etgan shaxs — 2001-yilda tug‘ilgan muddatli harbiy xizmatchi Artemiy Ryabchuk. Hodisadan so‘ng u avtomat bilan qochib ketgan. Tasdiqlanmagan ma’lumotlarga ko‘ra, hujumchi zavod hududidan chiqib ketmagan. Hudud o‘rab olingan va patrul nazorati ostida.
Dneprda politsiyaning Sirena operatsiyasi joriy etilib, politsiya va Milliy gvardiya bo‘linmalarining shaxsiy tarkibi ko‘tarildi. Ichki ishlar vazirligi hujumchining suratini e’lon qildi. Ukraina Milliy gvardiyasining qo‘mondoni, general-polkovnik Nikolay Balan hodisa joyiga jo‘nab ketdi.
Keyinroq hujumchi qo‘lga olingani haqida xabar berildi.
Izoh (0)