Rossiyada o‘tgan bir sutka ichida yana 57 212 kishida koronavirus infeksiyasi aniqlandi. Bu haqda COVID-19 ga qarshi kurash bo‘yicha federal tezkor shtab xabar berdi.

Foto: “TASS”

Ta’kidlanishicha, bu mamlakatda pandemiya boshlanganidan beri aniqlangan eng yuqori ko‘rsatkich hisoblanadi. Bundan oldingi rekord bir kun oldin qayd etilgan — 49 513 kishi.

O‘tgan bir sutka davomida Rossiyada 9902 kishi shifoxonaga yotqizilgan, 681 kishi COVID-19 asoratlari oqibatida vafot etgan. Shuningdek, yana 25 525 kishi sog‘aygan.

Moskvaning o‘zida 16 094 kishida koronavirus tasdiqlangan — bu ham Rossiya poytaxtida pandemiya boshlanganidan buyon qayd etilgan antirekorddir.

Rossiyada koronavirusning yangi to‘lqini omikron shtammi tarqalishi fonida boshlandi. Avvalroq “Rospotrebnadzor” rahbari Anna Popov vaziyat yomonlashsa, kunlik kasallanishlar soni 100 ming kishidan oshishi mumkinligi haqida ogohlantirgan edi.

Bundan oldin Rossiya hukumatining tarkibi yaqin vaqt ichida maksimal darajada masofadan turib ishlash tizimi formatiga o‘tkazilishi, dunyo bo‘ylab koronavirus bilan kasallanish bir hafta ichida 20 foizga oshgani to‘g‘risida xabar berilgandi.