AQSh va uning ittifoqchilari Rossiyaning Ukrainaga bostirib kirishi mumkinligi sabab Sharqiy Yevropa mamlakatlariga qo‘shimcha harbiy kontingentni yuborish masalasini muhokama qilmoqda. Bu haqda CNN o‘zining uchta manbasiga tayanib, xabar berdi.
Taxminlarga ko‘ra, qo‘shinlar Bolgariya, Ruminiya va Vengriyaga yuboriladi — ushbu mamlakatlarning har biriga ming nafardan harbiy xizmatchi.
22-yanvar kuni AQSh prezidentining Kemp-Deviddagi qarorgohida bo‘lib o‘tgan uchrashuvda Pentagon yuqori martabali vakili Baydenga bir nechta harakatlar rejasini taqdim etgani to‘g‘risida xabar berilgandi. Ular ming nafardan 5 ming nafargacha harbiy xizmatchini vaziyat yomonlashsa, ular sonini “o‘n barobargacha oshirish” imkoniyati bilan Sharqiy Yevropa davlatlariga yuborishni o‘z ichiga oladi.
Keyinroq Pentagon rasmiy vakili Jon Kirbi AQShda 8,5 ming harbiy xizmatchi yuqori shaylik holatiga keltirilganini ma’lum qildi. Ular qisqa muddatda Yevropaga yuborilishi mumkin.
Avvalroq Zelenskiy AQSh davlat kotibi bilan uchrashuvda Ukraina armiyasini modernizatsiya qilishda yordam so‘ragani, Kanada maxsus kuchlarining bir qismi Ukrainaga jo‘natilgani to‘g‘risida xabar berilgandi. Shuningdek, NATO Ukraina yaqinida Rossiya kuchlari to‘planayotgani sabab o‘z qurolli kuchlarini jangovar shay holatga keltirayotgani va Sharqiy Yevropaga qo‘shimcha kema hamda qiruvchi samolyotlarni yuborgani ma’lum bo‘lgandi.
NATO bosh kotibi Yens Stoltenberg alyansga a’zo davlatlar o‘z qo‘shinlarini Ukrainaga joylashtirmasligini bildirgan.
Izoh (0)