Россияда ўтган бир сутка ичида 88 816 кишида коронавирус аниқланди ва 665 бемор вафот этди. Бу ҳақда COVID-19 га қарши кураш бўйича федерал тезкор штаби маълумотларига таяниб, «Интерфакс» хабар берди. Бу пандемия бошланганидан бери энг юқори кўрсаткич бўлиб, аввалги антирекорд бир кун аввал қайд этилганди — 74 692 киши (кунлик ўсиш 14 124 киши).
COVID-19 га чалиниш ҳолатларининг аксарияти, одатдагидек, Москвада аниқланган — 26 586 киши, у ерда бир кун олдин 19 856 кишида инфекция тасдиқланганди.
Тезкор штаб маълумотларига кўра, мамлакатнинг 74 та вилоятида коронавируснинг омикрон штамми аниқланган бўлиб, бу 20 январь ҳолати билан таққослаганда 19 та вилоятга кўп демак.
Аввалроқ бош вазир ўринбосари Татяна Голикова янги штамм Россияда етакчига айланганини маълум қилганди. Чунки 26 январь ҳолати бўйича аниқланган ҳолатларнинг 47,9 фоизини дельта, 52,1 фоизини эса омикрон ва бошқа вариантлар ташкил этмоқда.
Бир сутка давомида коронавирус асоратлари оқибатида вафот этганлар сони 16 январдан буён деярли бир хил даражада қолмоқда — 700 кишидан ошмаяпти.
Россияда пандемия бошланганидан буён 11 миллион 404 минг 617 кишида COVID-19 тасдиқланган, 328 770 киши вафот этган ва 10 миллион 129 минг 691 киши соғайган.
Россияда коронавирус билан кунлик касалланишлар сони 25 январь ҳолатига 74 692 кишини, 24 январь ҳолатига 65 109 кишини, 23 январь ҳолатига 63 205 кишини, 22 январь ҳолатига 57 212 кишини ташкил этиб, мамлакатда ҳар куни COVID-рекордлар ўрнатилмоқда.
Изоҳ (0)