23-yanvar holatiga ko‘ra, Rossiyada yana 63 205 kishida koronavirus aniqlandi, deb xabar beradi COVID-19 ga qarshi kurash bo‘yicha federal tezkor shtab. Bu butun pandemiya davridagi eng yuqori ko‘rsatkich. Avvalgi antirekord bir kun avval qayd etilgandi — 57 212 kishida infeksiya aniqlangan.

Foto: Reuters

Rossiyada COVID-19 bilan kasallanganlarning umumiy soni 11 108 191 nafarga yetdi. O‘tgan sutka davomida mamlakatda ushbu kasallikdan 679 kishi, pandemiya boshidan beri esa 326 112 kishi vafot etdi.

Xususan, Moskvada bir kunda 73 (jami 38 368), Sankt-Peterburgda 65 (jami 29 416), Podmoskovyeda 42 (jami 13 039), Krasnoyarsk o‘lkasida 29 (jami 9280) kishi vafot etgan.

Pandemiya boshidan beri 10 023 622 kishi infeksiyadan tuzalgan, shu jumladan, so‘nggi 24 soat ichida 23 045 bemor shifoxonalardan chiqarilgan.

Rossiyada koronavirusning yangi to‘lqini omikron shtammi tarqalishi fonida boshlandi. Tezkor shtabning 20-yanvardagi ma’lumotlariga ko‘ra, COVID-19 ga chalinish holatlari orasida omikronning ulushi 42,8 foizni tashkil etmoqda. Shu bilan birga delta shtamm hamon ustunlik qilmoqda — 56,2 foiz.

Avvalroq “Rospotrebnadzor” rahbari Anna Popov vaziyat yomonlashsa, kunlik kasallanishlar soni 100 ming kishidan oshishi mumkinligi haqida ogohlantirgan edi.