Xabaringiz bor, 25-yanvar kuni mintaqaviy energotizimda ro‘y bergan nosozliklar sabab Respublika bo‘ylab elektr energiyasi ta’minotida uzilishlar bo‘ldi. Tabiiyki, ushbu holat natijasida Buxoro neftni qayta ishlash zavodi faoliyati ham vaqtincha to‘xtadi.
“O‘zbekneftgaz” AJ boshqaruvi raisi Mehriddin Abdullayev boshchiligida tuzilgan “Vaqtinchalik shtab” a’zolari tomonidan elektr ta’minoti tiklangach, boshqarmalar hamda zavodlar faoliyatini qayta yo‘lga qo‘yish ishlari olib borildi. Tizimdagi korxonalar faoliyati deyarli to‘liq tiklandi.
Boshqaruv raisi Buxoro neftni qayta ishlash zavodiga qilgan ishchi tashrifi davomida texnologik jarayonlarning qayta yo‘lga qo‘yilgani, qurilmalarning ish holati bilan yaqindan tanishdi.
Tashrif davomida Buxoro neftni qayta ishlash zavodida ham “Vaqtinchalik shtab” tashkil qilish hamda qurilmalar to‘liq quvvatda ishlashini monitoring qilib, to‘liq nazorat olib borish bo‘yicha zavod direktori Akbar Fazilovga topshiriqlar berildi.
Shuningdek, respublika iste’molchilarini neft mahsulotlari bilan barqaror ta’minlash, shunday murakkab vaziyatda o‘z vazifasini sidqidildan bajarayotgan barcha ishchi xodimlarga zarur sharoitlar yaratish bo‘yicha vazifalar belgilab berildi.
Boshqaruvi raisi zavodning markaziy asosiy tarkibiy bo‘linmalarida bo‘lib, texnologik qurilmalarning ishlash holati va bu borada zarur bo‘ladigan moliyaviy masalalar yuzasidan muhokama o‘tkazdi. U markaziy taqsimlash podstansiyasida bo‘lib, asosiy ishlab chiqarish sexining texnologik zonasida joylashgan dizel generatorni va uning zarur bo‘lganda ishlash holatini o‘rgandi.
Boshqaruv raisi elektr ta’minotida uzilish kuzatilganda, ushbu generatorning avtomatik ishlashini doimo nazorat qilib borish kerakligini hamda aynan mana shu orqali zavodning faoliyatini vaqtincha xavfsiz to‘xtatib turishga erishish mumkinligini ta’kidladi.
Buxoro neftni qayta ishlash zavodining barqaror ish rejimiga o‘tishi uchun qilingan ishlar holati ham o‘rganildi hamda ushbu jarayonlarda boshqaruv raisi shaxsan ishtirok etdi.
O‘z navbatida GTL kerosini qabul qilish, saqlash va aralashtirish uchun sig‘imi 5000 kub metr bo‘lgan 2 ta rezervuar qurilish maydonchasida o‘rganish o‘tkazildi hamda qurilish-montaj ishlarining hozirgi holati joyida tahlil qilindi.
Buxoro neftni qayta ishlash zavodi mutaxassislariga joriy loyihalarni amalga oshirishni tezlashtirish, belgilangan muddatlarda yakunlash bo‘yicha zarur ko‘rsatmalar berildi.
Bundan tashqari, boshqaruv raisi zavod mutaxassislari bilan ham ishchi uchrashuv o‘tkazdi hamda ularning yashash va ishlash sharoiti, zavod faoliyati, ko‘rsatkichlarni bajarilishi bilan bog‘liq dolzarb masalalar muhokama qilindi.
Zavod direktorining yangi turdagi mahsulotlarni o‘zlashtirish, ishlab chiqarish hajmini oshirish borasida qilinayotgan amaliy ishlar, zavodning yanada samarali ishlashi uchun 2022-yilda bajarilishi rejalashtirilgan loyihalar va amalga oshirilayotgan qator chora-tadbirlar bo‘yicha hisobot muhokama qilindi.
Bugungi ishchi tashrif davomida Buxoro neftni qayta ishlash zavodida ekologik vaziyat va havo tozaligini yaxshilash, “Yashil makon” umummilliy loyihasi ijrosini ta’minlash uchun “Dolzarb qirq kun” aksiyasi doirasida o‘tqazilgan 10 mingga yaqin turli xildagi manzarali hamda mevali ko‘chatlar maydoni va parvarishlash ishlari ham joyida o‘rganildi.
Ko‘chatlarni parvarish qilish davomida suv resurslaridan oqilona foydalanish hamda “O‘zbekneftgaz” AJ ko‘magida tomchilatib sug‘orish tizimini to‘liq yo‘lga qo‘yish ta’kidlandi.
Tashrif so‘nggida boshqaruv raisi tomonidan bugungi kunda sanoat xavfsizligini ta’minlash uchun kompleks yondoshish, energiya samaradorligini oshirish va energoresurslardan samarali foydalanishni optiallashtirish, ishlab chiqarishda xavfsizlik qoidalarini to‘liq bajarish kerakligini ta’kidladi va ana shundagina iqtisodiyot hamda aholini neft mahsulotlari bilan uzluksiz ta’minlash mumkinligi qayd etildi.
Eslatib o‘tamiz, elektr ta’minoti yetkazib berilishi tiklanganidan so‘ng zavod to‘liq rejimda ishlab boshladi va o‘rtacha kunlik avtobenzin 2500 tonna, Jet A-1 markali aviatsiya yoqilg‘isi 200 tonna, dizel yoqilg‘isi 700 tonna, mazut 180 tonna hamda 560 tonna boshqa turdagi neft mahsulotlarini ishlab chiqarishga erishish ta’minlandi.
“O‘zbekneftgaz” AJ matbuot xizmati
Izoh (0)