Huquqni muhofaza qiluvchi idoralar tomonidan hamkorlikda o‘tkazilgan tezkor tadbirda “Tavhid va jihod katibati” nomli terrorchilik tashkilotining bir guruh a’zolari ushlandi, deb xabar beradi poytaxt IIBB axborot xizmati.
Ma’lum qilinishicha, ular Toshkent shahri hududida jamoaviy yig‘inlarni o‘tkazib, kelgusida Suriya hududida faoliyat yuritayotgan terrorchilik tashkilotlarining safiga qo‘shilishni rejalashtirib kelgan.
Aniqlanishicha, “Tavhid va jihod katibati” tarafdorlarining soni 30 nafarga yaqin bo‘lib, asosan yoshlardan iborat va ularning ayrimlari Andijon, Surxondaryo va Qashqadaryo viloyatlaridan Toshkent shahriga ishlash maqsadida kelgan.
Hozirda mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari davom ettirilmoqda.
Avvalroq Surxondaryoda maktab o‘quvchilari orasida jihod va hijrat g‘oyalarini targ‘ib qilgan shaxslarga sud hukmi o‘qilgani, Toshkent viloyatida Suriyadagi jangarilar safiga qo‘shilmoqchi bo‘lgan shaxslar qo‘lga olingani, Samarqandda “Jihodchilar”ning 11 nafar virtual a’zosiga hukm o‘qilgani to‘g‘risida xabar berilgandi.
Izoh (0)