Dunyoning mashhur va yetakchi telekanallaridan biri — Eurosport’da Tashkent City Professional Cycling Team velosport jamoasining reklama kampaniyasi o‘tkazilmoqda. Bu nafaqat velosport va sog‘lom turmush tarzini targ‘ib qilish, balki O‘zbekistonning turizm salohiyatini yuksaltirishga turtki bera oladi.
Turizm va sport vazirligi, O'zbekiston velosiped sporti federatsiyasi va UzReport TV telekanali ko‘magida dunyoning mashhur va yetakchi telekanallaridan biri — Eurosport’da Tashkent City Professional Cycling Team jamoalarining reklama kampaniyasi o‘tkazilmoqda.
Poytaxt ko‘chalarida suratga olingan 5 va 15 soniyali reklama roliklari Yevropa, Yaqin Sharq va Rossiya kabi 50 dan ziyod mamlakatlarda, turli tillarda namoyish etilmoqda. Bu esa nafaqat velosport va sog‘lom turmush tarzini targ‘ib qilish, balki O‘zbekistonning turizm salohiyatini yuksaltirishga turtki bera oladi. Negaki kadrlarda poytaxtimizning ko‘rki hisoblangan inshootlar, xususan, Tashkent City zamonaviy biznes markazi kabi yirik obyektlar namoyish etilmoqda.
Ma’lumot uchun, reklama kampaniyasi 26-fevralga qadar davom etib, bu vaqt mobaynida Pekindagi qishki Olimpiya o‘yinlari va 20—26-fevral kunlari BAAda bo‘lib o‘tadigan velotur bahslarini qamrab oladi. Mazkur videoroliklarni Eurosport’ning ijtimoiy tarmoqlarida ham kuzatish mumkin.
Aytib o‘tish lozimki, O‘zbekiston Prezidentining 2021-yil 24-sentabrda qabul qilingan “Velosportni rivojlantirishga doir kompleks chora-tadbirlar to‘g‘risida” (PQ 5251) qarori bilan Tashkent City Professional Cycling Team va Tashkent City Professional Women Cycling Team professional velosport jamoalari tashkil etilgan edi.
Bugunga kelib, ushbu jamoalar xalqaro musobaqalarda O‘zbekiston sharafini himoya qilish uchun Xalqaro velosipedchilar ittifoqi (UCI) litsenziyasini ham qo‘lga kiritgan.
Reklama huquqi asosida.
Izoh (0)