Andijon shahrida o‘zini ichki ishlar xodimi sifatini tanishtirib, fuqarolardan tamagirlik yo‘li bilan pul undirib kelgan shaxs aniqlandi. Bu haqda Andijon viloyati IIB axborot xizmati xabar berdi.
Ma’lum bo‘lishicha, Baliqchi tumanida yashovchi fuqaro T.U 2021-yilning sentabr oyida Andijon shahri Istiqlol ko‘chasida joylashgan harbiy kiyimlar tikish bilan shug‘ullanuvchi savdo do‘konidan 3 million so‘mga ichki ishlar organlarining barcha mavsumiy kiyimlarini to‘liq holatda tiktirgan. U ushbu kiyimda bir necha marotaba Andijon shahriga kelgan va fuqarolarga o‘zini ichki ishlar xodimi sifatida tanishtirgan, ularga turli masalalarda qonuniy yordam berishini aytib, tamagirlik yo‘li bilan pul undirib kelgan.
Holat yuzasidan IIV Shaxsiy xavfsizlik bosh boshqarmasining Andijon viloyati bo‘yicha boshqarmasi tomonidan tezkor tadbirlar olib borilgan. Tadbirlar davomida T.U 2021-yilning dekabr oyida shaharning “Sarvontepa” MFYda yashovchi fuqaro Q.F.dan fuqarolik pasportini yangilab berish evaziga 1,1 million so‘m, shuningdek, Q.F.ning turmush o‘rtog‘i U.O.dan nikoh guvohnomasi qildirib berish evaziga 900 ming so‘m pullarni tamagirlik yo‘li bilan olgani aniqlangan.
Mazkur holat yuzasidan Andijon shahri bo‘yicha IIO FMB tomonidan tergovga qadar tekshirish ishlari olib borilmoqda.
Avvalroq Toshkent viloyatidan Bektemir YPX maskani orqali Toshkent shahriga kirib kelgan soxta IIB xodimi qo‘lga olingani to‘g‘risida xabar berilgandi.
Izoh (0)