Chinozda soxta YPX xodimi qo‘lga olindi. U ikki yil oldin ham xuddi shu qilmishi uchun jazoga tortilgan

Toshkent viloyatida ichki ishlar organi xodimining kiyimini kiyib, qo‘lbola usulda yasalgan ko‘krak nishonini taqib, soxta YPX xodimi vazifasini bajarayotgan fuqaro qo‘lga olindi. Bu haqda Toshkent viloyati IIBB YHXB axborot xizmati “Daryo”ga ma’lum qildi.

6-fevral kuni M-39 Toshkent—Termiz xalqaro avtomobil yo‘lida avtoradar bilan xizmat olib borayotgan Toshkent viloyati IIBB YHXB YPX inspektorlari — safdor Bekjon Yerejepov va serjant Mansur Normatov oldiga “KamAZ” avtomobili kelib to‘xtaydi. Haydovchi inspektorlarga yo‘lda bir xodim ishlayotganligini, ammo uning bodikamerasi va ko‘krak nishoni g‘alatiroq ekanligini aytadi.

YPX inspektorlari zudlik bilan aytilgan joyga yetib borgan. Inspektorlar Nexia rusumli avtomobilda o‘tirgan “xodim”dan kimligini va bu yerda nima ish bilan shug‘ullanayotganligini so‘rashganida u voqea joyidan qochib ketmoqchi bo‘ladi. Biroq zudlik bilan qo‘lga olinib, Chinoz tuman IIBga olib kelinadi.

Chinoz tumani ichki ishlar bo‘limi tezkor xizmat vakillari, xususan, O‘z xavfsizlik xizmati xodimlari xolislar ishtirokida uning boshqaruvida bo‘lgan avtomashina salonini ko‘zdan kechirishganida, u yerdan 24 dona bir xil seriya va raqamli ma’muriy bayonnomalar, Farg‘ona viloyati ichki ishlar boshqarmasi tomonidan berilgan xizmat guvohnomasining rangli nusxasi, uning egnidagi kiyimiga o‘rnatilgan, ustiga “Diqqat” yozuvi tushirilgan qalbaki bodikamera, yelimdan eritib yasalgan YPX inspektorining ko‘krak nishoni va jezl topilgan.

“Muqaddam ichki ishlar organida ishlaganman, 2016-yilda o‘z ixtiyorim bilan bo‘shaganman. Ko‘krak nishoni va bodikamerani o‘zim qo‘lbola usulda yasagan edim. Xato qildim, bu ishimdan pushaymonman”, — deydi siri fosh bo‘lgan soxta YPX xodimi Azizbek Ro‘zmetov.

Ta’kidlanishicha, Azizbek Ro‘zmatov 2018-yilning yanvar oyida o‘zidan soxta yo‘l patrul xizmati inspektori yasab, Sirg‘ali tumani hududida ishlayotgan vaqtda qo‘lga tushgan. Unga nisbatan Jinoyat kodeksining 227 va 228-moddalari 1-qismida (Hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) ko‘rsatilgan jinoyatlarni sodir etganlik yuzasidan ayblov e’lon qilinib, sud qarori bilan axloq tuzatish ishlari jazosi qo‘llanilgan edi.

Hozirda Chinoz tuman ichki ishlar bo‘limi huzuridagi tergov bo‘limi tomonidan tergovga qadar surishtiruv harakatlari olib borilmoqda.