Андижон шаҳрида ўзини ички ишлар ходими сифатини таништириб, фуқаролардан тамагирлик йўли билан пул ундириб келган шахс аниқланди. Бу ҳақда Андижон вилояти ИИБ ахборот хизмати хабар берди.
Маълум бўлишича, Балиқчи туманида яшовчи фуқаро Т.У 2021 йилнинг сентябрь ойида Андижон шаҳри Истиқлол кўчасида жойлашган ҳарбий кийимлар тикиш билан шуғулланувчи савдо дўконидан 3 миллион сўмга ички ишлар органларининг барча мавсумий кийимларини тўлиқ ҳолатда тиктирган. У ушбу кийимда бир неча маротаба Андижон шаҳрига келган ва фуқароларга ўзини ички ишлар ходими сифатида таништирган, уларга турли масалаларда қонуний ёрдам беришини айтиб, тамагирлик йўли билан пул ундириб келган.
Ҳолат юзасидан ИИВ Шахсий хавфсизлик бош бошқармасининг Андижон вилояти бўйича бошқармаси томонидан тезкор тадбирлар олиб борилган. Тадбирлар давомида Т.У 2021 йилнинг декабрь ойида шаҳарнинг «Сарвонтепа» МФЙда яшовчи фуқаро Қ.Ф.дан фуқаролик паспортини янгилаб бериш эвазига 1,1 миллион сўм, шунингдек, Қ.Ф.нинг турмуш ўртоғи У.О.дан никоҳ гувоҳномаси қилдириб бериш эвазига 900 минг сўм пулларни тамагирлик йўли билан олгани аниқланган.
Мазкур ҳолат юзасидан Андижон шаҳри бўйича ИИО ФМБ томонидан терговга қадар текшириш ишлари олиб борилмоқда.
Аввалроқ Тошкент вилоятидан Бектемир ЙПХ маскани орқали Тошкент шаҳрига кириб келган сохта ИИБ ходими қўлга олингани тўғрисида хабар берилганди.
Изоҳ (0)