Burkina-Fasoda harbiy isyon, prezident oilasi mamlakatni tark etgan — OAV

Burkina-Faso prezidenti Rosh Mark Kaborening oilasi harbiy isyon haqidagi xabarlar ortidan mamlakatni tark etdi, deb xabar beradi LSI Africa portal.

Ta’kidlanishicha, harbiylar prezidentning iste’fosini talab qilgan. Mamlakat yetakchisining o‘zi jandarmeriya kuchlari qo‘riqlovida ekani aytilmoqda. Associated Press’ning yozishicha, Kaborening poytaxt Uagadugudagi qarorgohida otishma ovozlari eshitilgan, osmonda esa vertolyotlar paydo bo‘lgan.

Ma’lumotlarga ko‘ra, harbiy isyonchilar 2015-yilda davlat to‘ntarishiga urinishda ayblanib, qamoqqa olingan general Jilber Dyendereni ozod etgan.

LSI’ning ma’lum qilishicha, Jilber Dyendere qo‘zg‘olonchilar uni “ozod etgach”, o‘z kamerasini tark etgan. Hozirda u general Abubakar Sangule Lamizana nomidagi harbiy lagerda.

Burkina-Faso hukumati 11-yanvar kuni mamlakatda hokimiyatni egallashda gumonlangan ikki guruh harbiylar qo‘lga olingan edi. Guruhlarga yosh ofitserlar boshchilik qilgani aytilmoqda. So‘nggi bir necha oy ichida prezident Kabore mamlakat qurolli kuchlari qo‘mondonligida bir qator yirik o‘zgarishlarni amalga oshirgan.

Avvalroq Afrikaning Burkina-Faso davlatida jangarilar 40 dan ortiq odamni o‘ldirgani, Burkina-Fasoda politsiyachilarga uyushtirilgan hujum oqibatida 53 kishi halok bo‘lgani to‘g‘risida xabar berilgandi.