Буркина-Фасо президенти Рош Марк Каборенинг оиласи ҳарбий исён ҳақидаги хабарлар ортидан мамлакатни тарк этди, деб хабар беради LSI Africa portal.
Таъкидланишича, ҳарбийлар президентнинг истеъфосини талаб қилган. Мамлакат етакчисининг ўзи жандармерия кучлари қўриқловида экани айтилмоқда. Associated Press’нинг ёзишича, Каборенинг пойтахт Уагадугудаги қароргоҳида отишма овозлари эшитилган, осмонда эса вертолётлар пайдо бўлган.
Маълумотларга кўра, ҳарбий исёнчилар 2015 йилда давлат тўнтаришига уринишда айбланиб, қамоққа олинган генерал Жилбер Дендерени озод этган.
LSI’нинг маълум қилишича, Жилбер Дендере қўзғолончилар уни «озод этгач», ўз камерасини тарк этган. Ҳозирда у генерал Абубакар Сангуле Ламизана номидаги ҳарбий лагерда.
Буркина-Фасо ҳукумати 11 январь куни мамлакатда ҳокимиятни эгаллашда гумонланган икки гуруҳ ҳарбийлар қўлга олинган эди. Гуруҳларга ёш офицерлар бошчилик қилгани айтилмоқда. Сўнгги бир неча ой ичида президент Каборе мамлакат қуролли кучлари қўмондонлигида бир қатор йирик ўзгаришларни амалга оширган.
Аввалроқ Африканинг Буркина-Фасо давлатида жангарилар 40 дан ортиқ одамни ўлдиргани, Буркина-Фасода полициячиларга уюштирилган ҳужум оқибатида 53 киши ҳалок бўлгани тўғрисида хабар берилганди.
Изоҳ (0)