AQSh rasmiylarining fikricha, Rossiya istalgan daqiqada Ukrainaga hujum qilishga qodir. Bu haqda Oq uy matbuot kotibi Jen Psaki brifingda aytib o‘tdi.
“Rossiya prezidenti Vladimir Putin Ukraina chegaralari bo‘ylab 100 ming qo‘shin to‘plash orqali, jumladan, yaqinda qo‘shma mashg‘ulotlar uchun Rossiya qo‘shinlarini Belarusga yuborish va Ukraina sharqiy chegarasida qo‘shimcha mashg‘ulotlar o‘tkazish bilan ushbu inqirozga zamin yaratdi”, — dedi Psaki.
Oq uy vakilining so‘zlariga ko‘ra, Rossiya bir qarorga kelishi kerak: yoki o‘z xatti-harakatlarining iqtisodiy oqibatlariga duchor bo‘ladi yoki vaziyatni hal qilishda diplomatik yo‘ldan boradi.
Psaki, shuningdek, Vashingtonda Rossiya hukumati Ukrainadagi elchixonasining xodimlarini evakuatsiya qilishga tayyorlanayotgani haqida ma’lumotlar borligini aytdi.
AQSh Davlat departamentining yana bir vakili jurnalistlarga aytishicha, Rossiya qo‘shinlari Rossiya—Belarus qo‘shma mashg‘ulotlarini o‘tkazish vaqtida Ukrainaga shimoldan — Belarus hududidan bostirib kirishi mumkin.Diplomatning so‘zlariga ko‘ra, Rossiya qo‘shinlarining rejalashtirilgan qo‘shma harbiy mashg‘ulotlar bahonasida Belarus yo‘nalishida harakatlanishi haqidagi xabarlar xavotirli.
“Belarusning bunday hujumda ishtirok etishi belaruslar uchun, shuningdek, biz va ittifoqchilarimiz, hamkorlarimiz uchun mutlaqo nomaqbullik bo‘ladi”— dedi diplomat.
Shu bilan birga, uning ta’kidlashicha, hozir Belarusda sodir bo‘layotgan voqealarning aksariyati tashvish uyg‘otadi. Xususan, bu yangi Konstitutsiya loyihasi bilan bog‘liq bo‘lib, uning ayrim bandlari Rossiyaga Belarusda yadroviy va noyadroviy qurollarni joylashtirish uchun yo‘l ochishi mumkin, deya aniqlik kiritdi AQSh rasmiysi.Uning so‘zlariga ko‘ra, Vashington o‘z xavotirlarini Minskga “shaxsiy ravishda” yetkazgan.
G‘arb davlatlari Rossiya qo‘shinlarining Ukraina chegarasi yaqinida harakatlanayotganidan xavotirda. Ularning fikricha, Rossiya bu davlatga bostirib kirishni rejalashtirayotgan bo‘lishi mumkin. Rossiya esa buni inkor etmoqda.
Meduza nashrining xabar berishicha, AQSh Davlat kotibi Entoni Blinken 18—20 yanvar kunlariga rejalashtirilgan Ukraina va Germaniyaga safaridan so‘ng Jenevada Rossiya tashqi ishlar vaziri Sergey Lavrov bilan uchrashadi.Xabarga ko‘ra, Blinken va Lavrov 18-yanvar kuni bo‘lib o‘tgan telefon suhbatida shunga kelishib olgan. Muzokaralar haqida Rossiya TIV va AQSh Davlat departamenti saytlarida ham xabar berilgan. Biroq tomonlarning bayonotlarida Jenevada bo‘ladigan uchrashuv tilga olinmagan. “RIA Novosti” va “Kommersant” xabarlariga ko‘ra, uchrashuv 21-yanvar kuni bo‘lib o‘tadi.
“Blinken, Lavrov bilan uchrashuvda diplomatik muhokamalarni davom ettiradi va Ukraina chegaralarida keskinlikni yumshatishga chaqiradi”, — degan Davlat departamenti matbuot kotibi. Shu bilan birga, u muzokaralar kimning tashabbusi bilan o‘tkazilayotganiga aniqlik kiritmagan.
Rossiya diplomatik missiyasi OAVga Lavrov va Blinkenning 21-yanvarga rejalashtirgan uchrashuvi kun tartibi ishlab chiqilayotganini bildirgan.
Izoh (0)