АҚШ расмийларининг фикрича, Россия исталган дақиқада Украинага ҳужум қилишга қодир. Бу ҳақда Оқ уй матбуот котиби Жен Псаки брифингда айтиб ўтди.
«Россия президенти Владимир Путин Украина чегаралари бўйлаб 100 минг қўшин тўплаш орқали, жумладан, яқинда қўшма машғулотлар учун Россия қўшинларини Беларусга юбориш ва Украина шарқий чегарасида қўшимча машғулотлар ўтказиш билан ушбу инқирозга замин яратди», — деди Псаки.
Оқ уй вакилининг сўзларига кўра, Россия бир қарорга келиши керак: ёки ўз хатти-ҳаракатларининг иқтисодий оқибатларига дучор бўлади ёки вазиятни ҳал қилишда дипломатик йўлдан боради.
Псаки, шунингдек, Вашингтонда Россия ҳукумати Украинадаги элчихонасининг ходимларини эвакуация қилишга тайёрланаётгани ҳақида маълумотлар борлигини айтди.
АҚШ Давлат департаментининг яна бир вакили журналистларга айтишича, Россия қўшинлари Россия—Беларусь қўшма машғулотларини ўтказиш вақтида Украинага шимолдан — Беларусь ҳудудидан бостириб кириши мумкин.Дипломатнинг сўзларига кўра, Россия қўшинларининг режалаштирилган қўшма ҳарбий машғулотлар баҳонасида Беларусь йўналишида ҳаракатланиши ҳақидаги хабарлар хавотирли.
«Беларуснинг бундай ҳужумда иштирок этиши беларуслар учун, шунингдек, биз ва иттифоқчиларимиз, ҳамкорларимиз учун мутлақо номақбуллик бўлади»— деди дипломат.
Шу билан бирга, унинг таъкидлашича, ҳозир Беларусда содир бўлаётган воқеаларнинг аксарияти ташвиш уйғотади. Хусусан, бу янги Конституция лойиҳаси билан боғлиқ бўлиб, унинг айрим бандлари Россияга Беларусда ядровий ва ноядровий қуролларни жойлаштириш учун йўл очиши мумкин, дея аниқлик киритди АҚШ расмийси.Унинг сўзларига кўра, Вашингтон ўз хавотирларини Минскга «шахсий равишда» етказган.
Ғарб давлатлари Россия қўшинларининг Украина чегараси яқинида ҳаракатланаётганидан хавотирда. Уларнинг фикрича, Россия бу давлатга бостириб киришни режалаштираётган бўлиши мумкин. Россия эса буни инкор этмоқда.
Meduza нашрининг хабар беришича, АҚШ Давлат котиби Энтони Блинкен 18—20 январь кунларига режалаштирилган Украина ва Германияга сафаридан сўнг Женевада Россия ташқи ишлар вазири Сергей Лавров билан учрашади.Хабарга кўра, Блинкен ва Лавров 18 январь куни бўлиб ўтган телефон суҳбатида шунга келишиб олган. Музокаралар ҳақида Россия ТИВ ва АҚШ Давлат департаменти сайтларида ҳам хабар берилган. Бироқ томонларнинг баёнотларида Женевада бўладиган учрашув тилга олинмаган. «РИА Новости» ва «Коммерсантъ» хабарларига кўра, учрашув 21 январь куни бўлиб ўтади.
«Блинкен, Лавров билан учрашувда дипломатик муҳокамаларни давом эттиради ва Украина чегараларида кескинликни юмшатишга чақиради», — деган Давлат департаменти матбуот котиби. Шу билан бирга, у музокаралар кимнинг ташаббуси билан ўтказилаётганига аниқлик киритмаган.
Россия дипломатик миссияси ОАВга Лавров ва Блинкеннинг 21 январга режалаштирган учрашуви кун тартиби ишлаб чиқилаётганини билдирган.
Изоҳ (0)