Iroq va Turkiyani birlashtirib turuvchi yirik Kirkuk—Jeyhon neft quvurida portlash sodir bo‘ldi, deb xabar beradi Daily Sabah.
Turkiya quvur liniyasi operatori hisoblanuvchi Botas kompaniyasining ma’lum qilishicha, portlash mamlakat sharqidagi Kahramonmarash viloyati hududida joylashgan tumanda sodir bo‘lgan. Ko‘ngilsiz hodisa oqibatida neft quvurining faoliyati to‘xtatib qo‘yilgan, hodisa joyida o‘t o‘chiruvchilar ishlamoqda.
Daily Sabah’ning ta’kidlashicha, portlash sabab hozircha aniqlanmagan. Halok bo‘lganlar haqida ham ma’lumot yo‘q.
Ma’lumot uchun, 970 kilometrli quvurdan Iroqning Kirkuk shahridan Turkiyaning Jeyhon portiga neftni yetkazishda foydalaniladi.
Avvalroq Meksika ko‘rfazidagi dengiz quvur liniyasida kuchli yong‘in sodir bo‘lgani to‘g‘risida xabar berilgandi. Yong‘in besh soatdan keyin o‘chirilgan, hodisa joyida uchta o‘t o‘chiruvchi kema ish olib borgan. O‘shanda yong‘inga dengiz platformalari orasidagi quvur nazorat klapanlaridan uglevodorodlar oqib chiqishi sabab bo‘lgani aytilgandi.
Izoh (0)