18-yanvar kuni Nyu-Yorkning Bronks tumanidagi ko‘p qavatli uylar joylashgan dahada portlash sodir bo‘ldi. Ko‘ngilsiz hodisa oqibatida bir ayol halok bo‘lgan yana to‘qqiz kishi jarohat olgan, deb xabar beradi Reuters.
Qutqaruvchilarning ma’lum qilishicha, fojiaga gaz portlashi sabab bo‘lgan va bu binoda yong‘inni keltirib chiqargan.
Ta’kidlanishicha, halok bo‘lgan 77 yoshli ayoldan tashqari, uning 82 yoshli opasi ham jiddiy jarohat olgan. Hozirda u shifoxonada og‘ir ahvolda. Shuningdek, portlash oqibatida jiddiy jarohat olgan qo‘shni uydagi 68 yoshli ayol ham shifoxonaga yotqizilgan.
Bundan tashqari, jabrlanganlar orasida besh nafar politsiyachi ham bor — ular fuqarolarga yordam berish maqsadida yonayotgan bino ichiga kirgan. Huquq-tartibot idorasining xodimlari tutundan zaharlangan, hozirda ularning ahvoli barqaror ekani aytilmoqda.
Sodir bo‘lgan voqea joyiga 200 ga yaqin o‘t o‘chiruvchi va tez yordam xodimlari jalb etilgan. Falokat sabablari aniqlangunga qadar dahadagi gaz ta’minoti o‘chirib qo‘yilgan.
Eslatib o‘tamiz, 10-yanvar kuni Bronksdagi ko‘p qavatli turar joy binosida sodir bo‘lgan yong‘in oqibatida 19 kishi halok bo‘lgandi. The New York Times ma’lumotlariga ko‘ra, yong‘in qurbonlari orasida to‘qqiz nafar bola ham bo‘lgan. Nyu-York hukumatining ma’lum qilishicha, 60 dan ortiq odam jabrlangan bo‘lib, ularning beshtasida Bronks shifoxonasiga yotqizilgan edi.
Izoh (0)