Avstriya Yevropada birinchi bo‘lib voyaga yetgan aholining barchasi uchun koronavirusga qarshi majburiy vaksinatsiyani joriy qiladi. Bu haqda Euractiv xabar berdi.
Qonun loyihasining yakuniy versiyasini taqdim etar ekan, mamlakat kansleri Karl Nexammer qonun 1-fevraldan kuchga kirishi kerakligini aytdi.
Parlamentda 20-yanvarda qonun loyihasiga ovoz berish bo‘lib o‘tadi, o‘shanda dastlabki, o‘tish bosqichi boshlanadi. Kirish bosqichidan so‘ng, mart oyining o‘rtalaridan boshlab politsiya qonunning bajarilishini nazorat qiladi: ular fuqarolardagi emlanganlik yoki emlanishdan tibbiy ozod qilinganlik to‘g‘risidagi sertifikatlarni tekshiradi. Ma’lum qilinishicha, emlanmaganlar 600 yevrodan 3600 yevrogacha jarimaga tortiladi.
Homilador ayollar va sog‘lig‘idagi muammolar sabab emlana olmaydigan odamlar vaksinatsiyadan ozod qilinadi.
Kanslerning ta’kidlashicha, bu emlanganlarni emlanmaganlarga qarshi qo‘yish emas, u “vaksinatsiya birgalikda erkin muhitda yashashning eng yaxshi kafolati” ekanini qo‘shimcha qildi.
Noyabr oxirida Avstriyada butun mamlakat bo‘ylab lokdaun e’lon qilingandi. Unga qadar esa faqat emlanmaganlar uchun lokdaun amalda edi.
Izoh (0)