Moderna bir necha hafta ichida omikronga qarshi vaksinaning klinik sinovlarini boshlaydi

AQShning Moderna farmatsevtik kompaniyasi koronavirusning omikron shtammiga qarshi vaksina sinovlarini yaqin haftalarda boshlashini e’lon qildi. Bu haqda kompaniya rahbari Stefan Benselga tayanib, “Interfaks” xabar berdi.

“Vaksinani ishlab chiqish jarayoni yakuniga yetmoqda. Yaqin haftalar ichida vaksina klinik sinovlardan o‘tkaziladi. Vakolatli idoralardan zarur ma’lumotlar olinganidan so‘ng mart oyida keyingi qadamlar borasida bir qarorga kelish mumkin bo‘ladi”, – degan Bansel Davosda o‘tgan Butunjahon iqtisodiy forumi doirasidagi konferensiyada.

Bundan tashqari, Moderna rahbari kompaniyaning asosiy maqsadi har yili COVID-19 hamda grippga qarshi turadigan buster ishlab chiqish ekanligini bildirdi.

“Shu tariqa odamlarda har yili qishda ikki yoki uchta vaksina dozasini olish zarurati bo‘lmaydi, ular bitta buster qabul qilib, ham koronavirusdan ham grippdan himoyalanadi”, – deya ta’kidlagan Bansel.

Uning so‘zlariga ko‘ra, bunday buster hammasi yaxshi ketsa, 2023-yil kuzida tayyor bo‘lishi va bir nechta davlatda ishlatilishi mumkin.

OAVda ko‘plab mamlakatlarda keksa odamlar va immun tizimi zaif aholi qatlamiga koronavirusga qarshi uchinchi vaksina bilan emlanish taklif qilinayotgani haqida xabarlar tarqalgan. Shuningdek, Isroilda va Chilida aholiga to‘rtinchi vaksina bilan emlanish takliflari berilgan. Jumladan, Vengriyada koronavirusga qarshi vaksinaning to‘rtinchi dozasi bilan emlanishga ruxsat etilgandi.

Avvalroq Bansel 2022-yil kuzida odamlar vaksinaning to‘rtinchi dozasini ham olishiga to‘g‘ri kelishi, sababi buster vaksina uchinchi dozasining kuchi bir necha oyda ketishi haqida gapirgandi. Yevropa vakolatli idorasi rasmiylari vaksinaning to‘rtinchi dozasi zaruratga aylanishi haqidagi mazkur bayonot borasida shubhalari borligini qayd etgan.

O‘z navbatida AQShda yuqumli kasalliklar borasida yetakchi mutaxassis Entoni Fauchi Davosdagi virtual forumda buster vaksinaning to‘rtinchi dozasi immun tizimiga salbiy ta’sir ko‘rsatishi xususida ma’lumotlar yo‘qligini aytgan.

Pfizer direktori Albert Burla odamlar koronavirusga qarshi mazkur kompaniya vaksinasining uchinchi dozasini olishlari zarurligi, sababi mazkur preparat koronavirus infeksiyasidan ishonchli himoyani ta’minlashini ta’kidlagandi.

“Keyinchalik yiliga bittadan doza bilan emlanadigan vaksinalarga o‘tiladi, faqat immuniteti past insonlarga har chorakda bir marta emlanish tavsiya qilinadi. Shu bilan birga bolalarni kasallikdan himoyalash uchun ham ularni vaksinatsiya qilish kerak. Bolalar bilan bog‘liq holatlar vaksinaning samaradorligi juda yuqori”, – degan Pfizer rahbari.