Ukrainaning beshinchi prezidenti, xalq deputati Pyotr Poroshenko 17-yanvar kuni ertalab Kiyevdagi Juliani aeroportiga yetib keldi. Bu haqda “UNIAN” xabar berdi. Aeroport yaqinida siyosatchining 1000-1500 ga yaqin tarafdorlari to‘plangan, deb yozadi “Ukrainskaya pravda”.
Pasport nazoratidan o‘tish vaqtida Poroshenkoga Ukraina Davlat tergov byurosi tergovchilari murojaat qilib, unga davlatga xiyonat va terrorizmga yordam berish ishi bo‘yicha so‘roqqa chaqiruv qog‘ozini bermoqchi bo‘lgan. Poroshenko chaqiruv qog‘ozini olishdan bosh tortgan.
17-yanvar kuni Kiyevning Pecherskiy tuman sudi Poroshenkoga ushbu ish bo‘yicha qanday ehtiyot chorasi tayinlashni hal qiladi. Sud majlisi mahalliy vaqt bilan soat 11:00 ga (Toshkent vaqti bilan 14:00) belgilangan.
Pasport nazorati vaqtida Poroshenkoning pasporti olib qo‘yilgan, shundan so‘ng sobiq prezident unga Ukraina hududiga kirishga ruxsat berilmayotganini aytgan. Tez orada uning pasporti qaytarilib, o‘zi aeroport nazoratidan o‘tgan.
Poroshenkoning Ukrainaga qaytishidan sal oldin “Leviy bereg” sobiq prezidentdan olingan intervyuni chop etdi. “Birinchidan, men qamoqqa tushmayman. Ikkinchidan, hibsga olinishimga yo‘l qo‘ymayman. Men Timoshenko (Ukraina sobiq bosh vaziri, 2011-yilda mansabini suiiste’mol qilganlikda ayblangan) emasman. Uchinchi pozitsiya — Ukrainani himoya qilish uchun imkon qadar samarali harakat qilaman. O‘zimni himoyalash orqali Ukrainani himoya qilayotganimga qat’iy ishonaman”, — degan Poroshenko.
2021-yilning dekabrida Poroshenko o‘zini respublika deb e’lon qilgan Donetsk va Lugansk xalq respublikalaridan “2014—2015-yillardagi harbiy qarama-qarshilik sharoitida” ko‘mir yetkazib berilgani sabab qo‘zg‘atilgan davlatga xiyonat bo‘yicha jinoiy ishda gumonlanuvchiga aylangandi. Poroshenko barcha ayblovlarni rad etgan.
Davlat tergov byurosi Poroshenko so‘roq uchun chaqiruv qog‘ozini bermoqchi bo‘lgan tergovchilarga e’tibor bermagani, so‘ng noma’lum tomonga jo‘nab ketganini xabar qilgan. “Yevropa birdamligi” partiyasi Poroshenkoning diplomatik tashrif bilan Turkiya va Polshaga ketganini, rejalashtirilgan uchrashuvlar va qisqa ta’tildan so‘ng Ukrainaga qaytishini bildirgan.
Yanvar oyida Kiyev sudi davlatga xiyonat ish bo‘yicha tergov doirasida Poroshenkoning mulkini, jumladan Vinnitsa va Kiyevdagi kvartiralarini, shuningdek, Kozindagi ko‘chmas mulkni xatlovga oldi.
Muxolifat platformasi – “Hayot uchun” partiyasi rahbari, OAV tomonidan “Putinning cho‘qintirgan otasi” deb ataluvchi Viktor Medvedchuk va Ukrainaning sobiq energetika vaziri Vladimir Demchishin ham ko‘mir yetkazib berish ishida gumon qilinmoqda.
Izoh (0)