Andijon viloyati perinatal markazi hovlisida 12 tup daraxt noqonuniy kesib tashlangani bo‘yicha hujjatlar prokuraturaga taqdim etilgandi. Bosh prokuratura matbuot xizmati holat yuzasidan jinoyat ishi qo‘zg‘atilganini ma’lum qildi.
Qayd etilishicha, mazkur holat Bosh prokuratura tomonidan tuzilgan ishchi guruh tomonidan o‘rganib chiqildi.
Prezidentning 2021-yil 30-dekabrdagi “Respublika ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida”gi farmoni bilan davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriyning amal qilishi muddatsiz davrga uzaytirilgandi.
Shunga qaramasdan, Andijon shahar obodonlashtirish boshqarmasi boshlig‘i G‘.Sh. tomonidan Andijon viloyati perinatal markazi hududidagi Eldor qarag‘ayi (Pinus eldarica) navli 12 tup daraxtlar qonunga xilof ravishda kesib yuborilganligi oqibatida tabiatga 115,5 million so‘m miqdorida zarar yetkazilgan.
O‘tkazilgan tekshirish natijasiga ko‘ra, Andijon shahar obodonlashtirish boshqarmasi boshlig‘i G‘.Sh.ga nisbatan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan jinoyat ishi qo‘zg‘atildi. Ayni paytda tergov harakatlari olib borilmoqda.
Eslatib o‘tamiz, Andijon Obodonlashtirish boshqarmasi viloyat perinatal markazi hududidagi 12 tup daraxtni 15-yanvar kuni kesib tashlagandi. Ijtimoiy tarmoqlarda tarqalgan xabarlarda daraxtlarni kesish viloyat hokimi buyrug‘i asosida amalga oshirilgani aytilgan. Viloyat hokimligi daraxtlar Andijon hokimi Shuhrat Abdurahmonovning buyrug‘i bilan kesilganini rad etgan.
Izoh (0)