Toshkent viloyatida opiy va gashishni kartoshka ko‘rinishida yashirgan narkokuryerlar ushlandi. Bu haqda “O‘zbekiston 24” telekanali xabar berdi.
Ma’lum qilinishicha, 13-yanvar kuni Davlat bojxona qo‘mitasi kontrabandaga qarshi kurashish bosh boshqarmasi va DXX tezkor guruhi Toshkent viloyatining Toshkent tumanida bir necha kishi ketayotgan Damas’ni kuzatuv ostiga olgan.
Toshkent tumanining “Hasanboy” mahallasiga kelganida Damas’ga bir necha qoplar yuklanayotganida tezkor guruh tomonidan to‘xtatib qolingan. Ushbu qoplar belgilangan tartibda tekshirilganida, ichida kartoshka ko‘rinishiga keltirilgan 481 dona o‘ramlar borligi, ular ochib ko‘rilganida opiy va gashish giyohvandlik vositalari yashirilgani aniqlangan.
Giyohvandlik vositalarining og‘irligi o‘rami bilan hisoblaganda jami 77 kilogramm 95 grammni tashkil etgan. Shundan so‘ng tezkor tadbir davom ettirilib, ushbu giyohvandlik vositalarini qabul qilib olishi kerak bo‘lgan xorijiy davlat fuqarosi ham qo‘lga olingan.
Qayd etilishicha, ayni paytda holat yuzasidan jinoyat ishi qo‘zg‘atilib, tergov harakatlari olib borilmoqda. Shuningdek, holatga aloqador boshqa shaxslarni aniqlash choralari ko‘rilmoqda.
Mavzuga doir:
- Jizzaxda og‘ufurushlar ularni IIBga chaqib berishini aytgan mijozni mashinasi bilan yoqib yubordi
- Qoraqalpog‘iston, Samarqand va Namanganda giyohvand moddalarni mamlakat hududiga olib kirgan shaxslar qo‘lga olindi
- DXX O‘zbekistonning bir qator hududlarida giyohvand moddalar savdosi bilan shug‘ullangan shaxslarni qo‘lga oldi (video)
- Toshkentda narkolaboratoriya faoliyatiga chek qo‘yildi. Jinoiy guruh a’zolarining uch nafari — talabalar
Izoh (0)