Sirdaryoda raqqosalar bilan videosi tarqalgani sababli ishdan ketgan tuman obodonlashtirish boshqarmasi boshlig‘i lavozimiga tiklandi

Sirdaryo tumani hokimining tegishli qarori bilan Nozim Muratov Sirdaryo tumani obodonlashtirish boshqarmasi boshlig‘i lavozimiga tayinlandi.

Qarorda keltirilishicha, Nozim Muratov ushbu lavozimga 2021-yilning 30-dekabridan ikki oylik sinov muddati bilan tayinlangan.

Eslatib o‘tamiz, 2021-yilning 13-iyunida Sirdaryo tumani hokimligi mas’ullari va davlat tashkilotlari rahbarlari va raqqosalar aks etgan videolavha tarqalib, keng muhokamalarga sabab bo‘lgandi.

Viloyat hokimligi munosabatida voqea 2020-yil oktabr oyining o‘rtalarida taxminan kech soat 21:00 da (ishdan tashqari vaqtda) Sirdaryo tumanidagi “Yevro Aziya” restoranida sodir bo‘lgani bildirilib, davlat xizmatchilariga lavozimdan ozod etish kabi qat’iy chora qo‘llanilishi belgilangani aytilgandi.

14-iyun kuni Sirdaryo tumani hokimi o‘rinbosari Nurali Mirzayev va Sirdaryo tumani obodonlashtirish boshqarmasi boshlig‘i Nozim Muratovlar egallab turgan lavozimlaridan ozod etilgandi.