Украина Рақамли трансформация вазирлиги ҳукумат сайтларига уюштирилган киберҳужумга Россиянинг алоқадорлиги ҳақида далиллар борлигини маълум қилди. Бу ҳақда бошқарма сайтида айтилган.
«Бугунги кунга келиб шуни айтиш мумкинки, барча далиллар киберҳужум ортида Россия турганига ишора қилмоқда. Москва гибрид урушни давом эттириб, ахборот ва кибермаконда ўз кучларини фаол равишда оширмоқда. Сўнгги киберҳужум Украинага қарши Россиянинг 2014 йилдан бери давом этаётган гибрид урушининг бир кўриниши», — дейилади вазирлик баёнотида.
Вазирлик маълумотларига кўра, ҳужумдан мақсад Украинадаги вазиятни беқарорлаштириш ва мамлакат аҳолисининг ҳокимиятга бўлган ишончига путур етказишдир.
Киберҳужумда Россиянинг иштироки борлигини айнан қандай далиллар тасдиқлашига аниқлик киритилмаган.
14 январга ўтар кечаси Украина ҳукумати веб-сайтларига кенг кўламли хакерлар ҳужуми уюштирилди. Украина хавфсизлик хизмати маълумотларига кўра, жами 70 га яқин веб-сайтлар, жумладан, Украина Ташқи ишлар вазирлиги ва Таълим вазирлиги манбалари ҳам ҳужумга учраган. Шу билан бирга, ҳеч қандай маълумот ўғирланмаган, контент бузилмаган, сайтларнинг иши бир неча соат ичида тикланган.
Украина ҳукумати дастлаб, киберҳужумни ким амалга оширганини тўғридан тоғри айтмасдан, бу Россия махсус хизматлари билан алоқадор хакерларнинг иши бўлиши мумкинлигига шама қилган. Россия президентининг матбуот котиби Дмитрий Песков эса буни Россияга қарши яна бир асоссиз айблов деб атаган.
«Биз буни Россияга қарши асоссиз айбловларнинг давоми деб биламиз. Украиналиклар ҳамма нарсада, ҳатто уларда об-ҳаво айниса ҳам бунга Россияни айблашига деярли ўрганиб қолганмиз», — деган Россия президентининг матбуот котиби.
Украина ҳукумати сайтларига қилинган ҳужумлардан сўнг, Европа Иттифоқи мамлакатлари 15 январь куни киберҳужумларга қарши кураш бўйича олти ҳафталик машғулотларни бошлади.
Изоҳ (0)