Yarim himoyachi Brunu Fernandesh “Manchester Yunayted” bilan yangi shartnoma borasidagi muzokaralarni to‘xtatdi.
Portugaliyalik futbolchining o‘tgan mavsumdagi yorqin o‘yinlaridan so‘ng klub unga yangi shartnoma taklif qilgan, rahbariyat Fernandeshning maoshini oshirishga loyiq deb hisoblaydi.
The Athletic xabariga ko‘ra, futbolchi va uning vakillari bu taklifni rad etgan hamda muzokaralar vaqtinchalik to‘xtatilgan. Manbalarning ta’kidlashicha, bu masala bo‘yicha muloqot may oyida, Brunu ham, “Manchester Yunayted” ham klubning 2022/23-yilgi mavsumdagi pozitsiyasini yaxshiroq bilganida tiklanishi kutilmoqda.
Ayni paytda Fernandesh haftasiga, taxminan, 100 ming funt maosh oladi. “Sporting”da u haftasiga 50 ming funt olgan.
Jamoada eng yuqori maoshni Krishtianu Ronaldu oladi — haftasiga 400 ming funtdan ortiq. David De Xeada esa bu ko‘rsatkich haftasiga 375 ming funtga teng. Pol Pogba, Rafael Varan, Antoni Marsyal, Jeydon Sancho, Edinson Kavani va Markus Reshford haftasiga 200 ming funt yoki bundan ko‘proq oladi. Harri Maguayr va Lyuk Shouning maoshlari ham shu summaga yaqin.
Brunu “Yunayted”ning o‘yiniga ta’sirini hisobga olib, jamoaning eng ko‘p maosh oluvchi futbolchilari bilan teng bo‘lishni xohlamoqda.
“Manchester Yunayted” hozirgi vaziyatdan xavotirda emas, chunki futbolchining amaldagi shartnomasi 2025-yilning iyunida yakuniga yetadi. Shuningdek, shartnomada kelishuvni yana bir mavsumga uzaytirish varianti ham bor.
Yarim himoyachi “Manchester Yunayted” safida 2020-yilning yanvar oyidan beri harakat qilib qilmoqda. U shu vaqtga APLda 70 ta o‘yinda maydonga tushib, 33 ta gol urdi va 22 ta golli uzatmani amalga oshirdi.
Izoh (0)