Marselo “Real”dagi sovrinlar soni bo‘yicha Serxio Ramosni ortda qoldirib, rekordchiga tenglashib oldi

“Real” Ispaniya Superkubogi finalida “Atletik”ni mag‘lub etdi (2:0) va musobaqa g‘olibiga aylandi.

Madridliklar himoyachisi Marselo uchun bu klub bilan qo‘lga kiritilgan 23-sovrin bo‘ldi. Shu tariqa Marselo bu boradagi klub rekordchisi Fransisko Xentoga yetib oldi, u ham 23 ta sovringa ega. Keyingi o‘rinlarni Serxio Ramos (22) va Manolo Sanchis (21) egallab turibdi.

Marselo 2007-yildan beri “Real”da to‘p surib keladi. U hozirgacha besh martadan Ispaniya chempionati va Superkubogi, to‘rt martadan Chempionlar Ligasi hamda klublar o‘rtasidagi Jahon chempionatida g‘olib chiqqan. Shuningdek, himoyachi uch marta UEFA Superkubogi va ikki bor Ispaniya Kubogini qo‘lga kiritgan.

33 yoshli braziliyalik futbolchining “Real” bilan shartnomasi 2022-yilning yozida yakuniga yetadi va katta ehtimol bilan klubdan erkin agent sifatida ketadi.

Marselo 2021/22-yilgi mavsumda barcha musobaqalarda 8 ta o‘yin o‘tkazib, birorta ham samarali harakatni amalga oshirmadi.