Joze Mourinyo “Everton” taklifini rad etdi. Mersisayd jamoasi Lempard, Runi, Gattuzo kabi mutaxassislar nomzodini ko‘rib chiqmoqda

“Roma” bosh murabbiyi Joze Mourinyo “Everton”dan tushgan taklifni rad etdi.

Mersisayd jamoasi bosh murabbiy Rafael Benitesni iste’foga chiqardi va portugaliyalik mutaxassisga taklif bilan chiqdi. Ammo Mourinyo ushbu taklifni rad etdi va “Roma”da qolishini bildirdi, deya xabar qilmoqda The Telegraph.

Sky Sport’ning xabariga ko‘ra, Joze Mourinyodan tashqari “Everton”ning qisqa ro‘yxatida “Chelsi”ning sobiq murabbiyi Frenk Lempard, “Derbi Kaunti” bosh murabbiyi Ueyn Runi, “Brayton”dan Grem Potter, Belgiya terma jamoasi ustozi Roberto Martines va “Roma”ning sobiq bosh murabbiyi Rudi Garsiya kabi mutaxassislar o‘rin olgan. Undan tashqari jamoani mavsum so‘ngiga qadar Dankan Fergyuson boshqarishi mumkin.

Jurnalist Nikolo Skira o‘z Twitter sahifasida “Milan”ning sobiq murabbiyi Jennaro Gattuzo ham mersisaydliklarning ro‘yxatidan o‘rin olganini yozdi. Ingliz jamoasi Gattuzoning agenti Jorje Mendesh bilan bog‘langan.

“Everton” APL 2021/22-yilgi mavsumidagi 19 o‘yinda 19 ochko jamg‘arib, 16-o‘rinda bormoqda.